શાસ્ત્રીનગર પોસ્ટ ઓફિસમાં કરોડો રૂપિયાની ઉચાપતના કૌભાંડમાં ED-CBI તપાસ કરશે -

બોગસ પાસબુક બનાવીને રોકાણકારોના કરોડો રૂપિયાનું રોકાણ અન્ય મિલકતોમાં કરાયું: શાસ્ત્રીનગર પોસ્ટ ઓફિસના બે અધિકારીઓની મિલીભગતથી કૌભાંડ આચરવામાં આવ્યું હતું

કેન્દ્રીય તપાસ એજન્સી એન્ફોર્સમેન્ટ ડિરેક્ટોરેટ (ઈડી) અને સેન્ટ્રલ બ્યૂરો ઓફ ઈન્વેસ્ટિગેશન (સીબીઆઈ) ના અધિકારીઓ અમદાવાદના નારણપુરા વિસ્તારમાં શાસ્ત્રીનગર ખાતે આવેલી પોસ્ટ ઓફિસના અંદાજે સાતથી ૧૦ કરોડ રૂપિયાની છેતરપિંડી કરવાના ચકચારી કૌભાંડ મામલે તપાસ કરશે. સિનિયર સિટીઝન્સ રોકાણકારોએ આ અંગે ક્રાઈમ બ્રાન્ચમાં ફરિયાદ કરી હતી. આ કિસ્સામાં બે મહિલા અને પિતા-પુત્રની ધરપકડ કરાઈ હતી. આ કેસની તપાસ દરમિયાન શાસ્ત્રીનગર પોસ્ટ ઓફિસના બે અધિકારીઓની મિલીભગત બહાર આવતાં તેમની પણ ધરપકડ કરાઈ હતી અને તેમણે લાખો રૂપિયાનું કમિશન પણ મેળવ્યું હોવાનું બહાર આવ્યું હતું. હવે ક્રાઈમ બ્રાન્ચની ફરિયાદના આધારે સીબીઆઈ અને ઈડીના અધિકારીઓ તબક્કાવાર તપાસ શરૂ કરશે, કારણ કે સમગ્ર કૌભાંડમાં સેન્ટ્રલ ગવર્નમેન્ટના બે અધિકારીઓની સંડોવણી પણ બહાર આવી છે.