“ராஜபக்ஷ குடும்பமே ரணிலிடம் ஒப்படைத்தது”

நாட்டை கட்டியெழுப்பிய தலைவரை எதிர்ப்பதற்கு மொட்டுக் கட்சிக்குத் தார்மீக உரிமை இல்லை என தெரிவித்த நகர அபிவிருத்தி மற்றும் வீடமைப்பு அமைச்சர் பிரசன்ன ரணதுங்க, "அன்று எங்கள் தலைவர்கள் ஓடிவிட்டனர்.

நாட்டைப் பொறுப்பேற்க யாரும் இல்லை. அப்போது எமது தலைவர்கள் இந்த நாட்டை ரணில் விக்ரமசிங்கவிடம் ஒப்படைத்தனர். அதை வழங்கியது ராஜபக்ஷ குடும்பமே தவிர நாங்கள் அல்ல," என்றார்.

மொட்டு உட்பட அனைத்து அரசியல் கட்சிகளும் நாட்டில் மீண்டும் அரசியலுக்கு வரக் கூடிய முறைமையை, தற்போதைய ஜனாதிபதி உருவாக்கியுள்ளதாக அமைச்சர் வலியுறுத்தினார்.

குருநாகல் மாவட்டத்தின் நிகவெரட்டிய தொகுதியில் கூட்டு ஜனாதிபதி தேர்தல் குழுக்களை அமைப்பது தொடர்பான கலந்துரையாடல் திங்கட்கிழமை (19) இடம்பெற்றது. இதில் கலந்து கொண்ட போதே அமைச்சர் பிரசன்ன ரணதுங்க மேற்கண்டவாறு தெரிவித்தார்.

"இங்கு வந்தவர்கள் அணைவரும் ரணில் விக்ரமசிங்கவுக்கு ஆதரவாகவே வந்திருக்கின்றனர். நான் ரணில் விக்ரமசிங்கவின் மேடையில் ஏறும் போது, நீங்கள் எந்தக் கட்சியை பிரதிநிதித்துவப்படுத்துகிறார்கள் என்று எல்லோரும் கேட்கிறார்கள். நாங்கள் ஸ்ரீலங்கா பொதுஜன பெரமுனவை பிரதிநிதித்துவப்படுத்துகிறோம். நாங்கள் அந்தக் கட்சியை விட்டு விலகவில்லை. இந்த தேர்தலில் ரணில் விக்ரமசிங்க மீண்டும் ஜனாதிபதியாக தெரிவு செய்யப்படுவார் என ஸ்ரீலங்கா பொதுஜன பெரமுனவின் பெரும்பான்மையான நிலைப்பாடு உள்ளது," என்றார்.