“அனைவரும் மக்கள் ஆணைக்கும் இறைமைக்கும் கட்டுப்பட்டுள்ளோம்”

அனைத்து அதிகாரங்களும் மக்களின் இறைமையில் இருந்தே உருவாகிறது.

நாம் கட்டுப்பட்டுள்ள சட்டம், எமக்குள்ள வரையறைகள் இவை அனைத்திற்கும் அப்பால் நாம் அனைவரும் மக்கள் ஆணைக்கும் இறைமைக்கும் கட்டுப்பட்டுள்ளோம் என்று ஜனாதிபதி அனுரகுமார திசாநாயக்க தெரிவித்தார்.

சர்வதேச ஊழல் எதிர்ப்பு தின நிகழ்வு, திங்கட்கிழமை (09) நடைபெற்றது. அதில், கலந்துகொண்டு உரையாற்றும் போதே மேற்கண்டவாறு குறிப்பிட்டார்.

கடந்த மக்கள் ஆணை எம் அனைவருக்கும் சமூகத்தின் எதிர்பார்ப்பை வெளிக்காட்டியுள்ளது என்று நான் கருதுகிறேன்.எமது நாட்டில் பல்வேறு சந்தர்ப்பங்களில் பல்வேறு விதமாக மக்கள் ஆணை வெளிப்படுத்தப்பட்டது. ஒரு சமயம் யுத்தம் நிறைவு செய்யப்பட்டதன் காரணமாக மக்கள் ஆணை வெளிப்படுத்தப்பட்டது. மற்றொரு சமயம் நாட்டின் ஜனநாயகத்தை உறுதிப்படுத்துவதற்காக மக்கள் ஆணையின் பிரதான போக்கு பிரதிபலிப்பானது.

2024 மக்கள் ஆணையில் இலஞ்ச ஊழலுக்கு எதிரான மக்களின் எதிர்பார்ப்பே பிரதானமானதாக உள்ளது. இந்த இடத்தில் இலஞ்ச ஊழல் திணைக்கள அதிகாரிகள் பொலிஸ் அதிகாரிகள், சட்டமா அதிபர் திணைக்கள அதிகாரிகள் நீதித் சேவையைப் பிரதிநிதித்துவப்படுத்துவோர் உட்பட பல முக்கிய துறைகளைப் பிரதிநிதித்துவப்படுத்துவோர் உள்ளனர். அரசியல் அதிகாரம் சார்பில் நான் இருக்கிறேன்.

அரசியலமைப்பின் ஊடாக நாம் ஒவ்வொருவருக்கும் அதிகாரம் வழங்கப்பட்டுள்ளது. பாராளுமன்றத்தில் நிறைவேற்றப்பட்ட சட்டத்தின் ஊடாக ஒவ்வொருவருக்கும் அதிகாரம் வழங்கப்பட்டுள்ளது. சட்டங்கள் விதிமுறைகள், சுற்று நிருபங்கள் மூலம் அதிகாரம் வழங்கப்பட்டுள்ளது. ஒவ்வொருவருக்கும் அதிகார எல்லைகள் அரசியலமைப்பின் ஊடாகவும் சட்டத்தின் ஊடாகவும் விதிக்கப்பட்டுள்ளன.