வலி தாங்கும் வலிமைக்கு வாழும் சான்று அபர்ணா

மூன்றுமுறை புற்றுநோய் பாதிப்பு, அதற்காக இரண்டு அறுவை சிகிச்சைகள், வலிமிகுந்த கீமோதெரபி, கதிரியக்க சிகிச்சைகள் என அடுத்தடுத்து வாழ்வைப் புரட்டிப்போட்ட நிகழ்வுகளை கடந்து தற்போது தன்னைப் போன்ற பெண்களுக்கு முன்னுதாரணமாக வாழ்கிறார் அபர்ணா.

- லாவண்யா வீரராகவன்

தற்போது சிங்கப்பூர் புற்றுநோய்ச் சங்கம் நடத்தும் நிகழ்ச்சிகளில் பங்கேற்றுவரும் இவர், தனது அனுபவத்தைப் பகிர்வதோடு பாதிக்கப்பட்ட பிற ஊக்கமளிக்கும் பெண்களுக்கு உதவுகிறார். இவ்வாண்டின் 'கிரேட் ஈஸ்டர்ன் விமன்ஸ் ரன்' (Great Eastern Women's Run) எனும் மகளிருக்கான தொடரோட்டத்தில் இவர் பங்கேற்கவுள்ளார்.

மணம் முடித்து எட்டு மாதங்கள் கனவுபோல் நாள்கள் நகர்ந்துசெல்வதற்குள், அக்கனவைக் கலைத்த 'ஹாட்ஜ்கின்ஸ் லிம் ஃபோமா' (Hodgkin's lymphoma) எனும் ஒரு வகைப் புற்றுநோய். “புற்றுநோய் குறித்த பயம் அதிகம் இருந்த 1996 காலக்கட்டத்தில், இந்தச் செய்தி என்னை உலுக்கியது. எனக்குப் புற்றுநோய் இருப்பது உறுதிப்படுத்தப்பட்ட அந்த வினாடி இன்னும் என் மனதில் காணொளிப் படமாகப் பதிந்துள்ளது,” என்கிறார் அபர்ணா.