இளையர்களை ஈர்க்கும் ஆர்க்கேட் விளையாட்டுகள்

நண்பர்களுடன் போட்டி போட்டுக்கொண்டு விறுவிறுப்புடன் கார் பந்தயத்தில் ஈடுபடுவது, பள்ளி முடிந்தவுடன் பக்கத்தில் இருக்கும் கடைத்தொகுதிக்கு விரைந்து அங்கு ‘டைம்சோன்’ விளையாட்டு நிலையத்தில் இன்புறுவது போன்ற நினைவுகள் பலரின் மனத்தில் நீங்கா இடம்பிடித்திருக்கும்.

சிங்கப்பூரர்கள் பலர் தங்களின் குழந்தைப் பருவத்தில் ‘ஆர்க்கேட் கேமிங்’ எனும் விளையாட்டுகளில் ஈடுபட்டிருப்பர். கேமிங் பல வகைகளில் இருந்தாலும் ஆர்க்கேட் கேமிங் இளையரிடையே மிக பிரபலம்.

1980களிலிருந்து இப்போது வரை கேமிங் உலகம் பரிணாமம் கண்டுள்ளது. பாரம்பரிய ஆர்க்கேட் விளையாட்டுகள், பேக்-மேன், ஸ்திரீட் ஃபைட்டர், டான்ஸ் டான்ஸ் ரெவல்யூஷன் போன்ற விளையாட்டுகளை இப்போது யாரும் அதிகம் விளையாடாமல் போனாலும் பழைமை கலந்த புதிய விளையாட்டுகள் களம் கண்டுள்ளன.

தீரா மோகத்துடன் பழைமையைக் காத்து வரும் இளையர்களில் சிலர் இன்னும் ஆர்க்கேட் விளையாட்டுகளில் ஆர்வம் குறையாமல் உள்ளனர். கடைத்தொகுதிக்கு செல்லும் ஆள்கள் குறைந்து வந்தாலும் அதில் இருக்கும் டைம்சோன் வளாகத்தில் சிறியவர் முதல் பெரியவர்கள்வரை பலர் கூட்டம் கூடுவதைப் பார்க்கலாம்.

அவர்களின் அனுபவங்களைக் கேட்டு வந்தது தமிழ் முரசு.

இளம் வயதில் முளைத்த ஆர்வம்

உயர்நிலைப் பள்ளியில் பயிலும்போது அரவிந்தரா, 26, ஆர்க்கேட் விளையாட்டு உலகத்தில் அடி எடுத்து வைத்தார். அப்போது ஓட்டுநர் உரிமம் இல்லாததால், அவர் டைம்சோன் நிலையத்தில் கார் பந்தய விளையாட்டுகளில் ஈடுபட்டு இன்பம் அடைந்தார்.

“டைம்சோன் செல்லும்போதெல்லாம் நான் புதிய முகங்களை சந்திக்கிறேன். இதனால் என் நட்பு வட்டமும் விரிவடைகிறது. மற்றவர்களுடன் இணைந்து விளையாடும்போது ஒருவிதத் தோழமை உணர்வும் ஏற்படுகிறது,” என்றார் அரவிந்தரா.

விளையாட்டு உலகம் இப்போது மின்னிலக்கமயமாகி வந்தாலும் பாரம்பரிய ஆர்க்கேட் விளையாட்டுகளுக்கு இன்னும் இடமுண்டு எனக் கருதும் அரவிந்தரா, படிப்படியாக இதர பந்தய விளையாட்டுகள், இருவழித்தொடர்பு விளையாட்டுகள் போன்றவற்றில் ஆர்வம் காட்டத் தொடங்கினார்.