உலகம் அனைத்து உயிரினங்களுக்கும் உரியது: விவரிக்க வரும் ‘அலங்கு’

இந்த உலகம் அனைத்து உயிரினங்களுக்குமானது என விவரிக்கும் ‘அலங்கு’.

அறிமுக நாயகன் குணாநிதி நடிப்பில் உருவாகியுள்ளது ‘அலங்கு’ திரைப்படம்.

‘உறுமீன்’, ‘பயணிகள் கவனிக்கவும்’ ஆகிய படங்கள் மூலம் கவனம் ஈர்த்த எஸ்.பி.சக்திவேல் இப்படத்தை இயக்கியுள்ளார்.

சங்கமித்ரா தயாரித்துள்ளார். இவர் பாட்டாளி மக்கள் கட்சித் தலைவர் அன்புமணி ராமதாசின் மகளாம்.

படத்தின் நாயகன் குணாநிதி, மற்றொரு தயாரிப்பாளர் சபரீஷ் ஆகிய இருவரும் பாமக நிறுவனர் ராமதாசின் மகள் வழிப் பேரன்கள்.

“தயாரிப்பாளர் சபரீஷ் ‘செல்ஃபி’ என்ற படத்தைத் தயாரித்து முடித்த பிறகு, தன் சகோதரருக்காக நல்ல கதையைத் தேடிக்கொண்டிருந்தார். அப்போது நான் சொன்ன கதை பிடித்திருந்ததால் அதைத் தயாரிக்க முன்வந்தார்.

“என்னுடைய தயாரிப்பாளர்கள் வணிக நோக்கத்துடன் படத்தயாரிப்பில் ஈடுபடவில்லை. அனைத்து தரப்பு மக்களும் ரசிக்கும்படியாக சமூக பார்வையுடன் இப்படத்தைத் தயாரித்துள்ளனர்,” என்கிறார் இயக்குநர் சக்திவேல்.