இம்ரான் கான் ஆதரவாளர்கள்-பாகிஸ்தானியக் காவல்துறையினர் இடையே கடும் மோதல் குறைந்தது அறுவர் உயிரிழப்பு இஸ்லாமாபாத்தில் பதற்றம்

பாகிஸ்தானின் முன்னாள் பிரதமர் இம்ரான் கானை சிறையிலிருந்து விடுவிக்கக் கோரி ஆயிரக்கணக்கான அவரது ஆதரவாளர்கள் தலைநகர் இஸ்லாமாபாத்தை நோக்கிப் பேரணியாகச் சென்றனர்.

இஸ்லாமாபாத்துக்குள் நுழைய ஆர்ப்பாட்டக்காரர்களுக்குத் தடை விதிக்கப்பட்டிருந்தது.

ஆனால் அதையும் மீறி ஆர்ப்பாட்டக்காரர்கள் தொடர்ந்து சென்றனர்.

அரசாங்கக் கட்டடங்களிலிருந்து கிட்டத்தட்ட பத்து கிலோமீட்டர் தூரத்தில் ஆர்ப்பாட்டக்காரர்களுக்கும் காவல்துறையினருக்கும் இடையே மோதல் ஏற்பட்டது.

இம்ரான் கானின் ஆதரவாளர்கள் கைகளில் தடிகளை வைத்திருந்ததாகவும் காவல்துறையினரை நோக்கி அவர்கள் கற்கள் வீசியதாகவும் தெரிவிக்கப்பட்டது.

இதற்குப் பதிலடி கொடுக்கும் வகையில் ஆர்ப்பாட்டக்காரர்களை நோக்கி காவல்துறையினர் கண்ணீர் புகைக் குண்டுகளை வீசினர்.