செயற்கை நுண்ணறிவு கல்வியைப் பாதிக்கிறதா? ஆசிரியர்கள் பதில்

எழுத்துலகில் செயற்கை நுண்ணறிவு ஏற்படுத்தியுள்ள தாக்கத்தையும் அதை எப்படித் தங்களுக்குச் சாதகமாகப் பயன்படுத்தலாம் என்பதையும் தற்போதைய பள்ளி மாணவர்கள் நன்கு அறிவர் என்றே கூறலாம்.

இருந்தபோதும் செயற்கை நுண்ணறிவை எப்படிச் சரியாகப் பயன்படுத்தி, கற்றலை மேம்படுத்தலாம் என்பது குறித்து மாணவர்கள், ஆசிரியர்கள், பெற்றோர் என முத்தரப்பிலிருந்தும் கேள்வி எழவேண்டும்.

சிங்கப்பூரின் கல்வி அமைச்சு கடந்த ஆண்டு தொடங்கிய தொழில்நுட்பம் வழியான கல்வித்துறை உருமாற்றத் திட்டம், கற்றல் அனுபவத்துடன் செயற்கை நுண்ணறிவுக் கூறுகளை மேலும் ஒன்றிணைக்கும் நோக்கத்தைக் கொண்டுள்ளது.

இந்தப் பெருந்திட்டம் வழியாக, மாணவர்களின் மின்னிலக்க அறிவை மேம்படுத்தக் கல்வியமைச்சு முனைகிறது.

மின்னிலக்கத் தளங்களில் உள்ள தகவல்கள் துல்லியமானவையா, நம்பகத்தன்மை வாய்ந்தவையா, தேவையானவையா என்பது போன்ற அம்சங்களை ஆராய்வதற்கான மின்னிலக்க நிர்வாகத் திறன்களைக் கற்பிப்பது நோக்கமாகும்.

இதில், செயற்கை நுண்ணறிவின் குறை, நிறைகளைக் கற்பிப்பதுடன் கற்றலுக்கும் வேலைக்கும் அதை எவ்வாறு ஆக்கபூர்வமாகப் பயன்படுத்தலாம் என்பதையும் மாணவர்கள் தெரிந்துகொள்ள வேண்டும்.

செயற்கை நுண்ணறிவுத் தளங்கள், இன்றைய மாணவர்களுக்குத் தகவல்களை எடுத்துத் தரும் ‘மாற்று ஆசிரியர்களாக’ உள்ளன.

‘சேட் ஜிபிடி’ (Chat GPT), ‘கூகல் ஜெமினி’ (Google Gemini), ‘மைக்ரோசாஃப்ட் கோபைலட்’ (Microsoft Copilot) போன்றவை இத்தகைய தளங்களில் சில.