ఆకట్టుకునే కట్టడాలు

ఓరుగల్లును పరిపాలించిన కాకతీయ రాజులు నిర్మించిన చారిత్రక ఆలయం రామప్ప దేవాలయం.

- షేక్ అబ్దుల్ హకీం జాని

రామప్ప దేవాలయం

ఓరుగల్లును పరిపాలించిన కాకతీయ రాజులు నిర్మించిన చారిత్రక ఆలయం రామప్ప దేవాలయం. ఇది శివాలయం. 'రామప్ప' అంటే ఈ ఆలయంలో దైవం పేరు కాదు. ఈ ఆలయాన్ని అద్భుత కళాఖండంగా మలచిన ప్రధాన శిల్పి పేరు. శిల్పకళా విశిష్టతతో నిర్మితమైన రామప్ప గుడి తెలంగాణలోని ములుగు జిల్లా వెంకటాపురం మండలం పాలంపేటలో నెలకొని ఉంది. వరంగల్లుకు 70 కి.మీ. దూరంలో ఉందీ ఆలయం. అపురూప కట్టడంగా ప్రపంచ ప్రసిద్ధి పొందిన రామప్ప అణువణువునా ప్రత్యేకతలతో, అద్భుత శిల్ప కళా నైపుణ్యంతో కాకతీయుల ఘనకీర్తిని చాటి చెబుతుంది. రామప్ప ఆలయ గోపురం నిర్మాణానికి ఉపయోగించిన ఇటుకలు నీళ్లల్లో వేస్తే తేలుతాయనేది పరిశీలకుల వాదన. శాండ్ బేస్డ్ టెక్నాలజీతో, భూకంపాలను తట్టుకునేలా, ఇసుక పునాదులపై నీళ్లపై తేలియాడే బరువులేని ఇటుకలతో నిర్మించిన కట్టడం రామప్ప ఆలయం. ఏనుగు పేడ, తవుడు, కరక్కాయ, చెట్ల జిగురుతో ఇటుకల తయారీ చేసినట్లు తెలుస్తోంది.ఇక్కడ ఒకే రాయిలో మూడు రంగులు కలిగి వుండడం ప్రధానమైన అంశం. ఈ ఆలయంలో శిల్పకళ విశిష్టతను తెలిపే మరో అద్భుతం సప్తస్వరాలు పలికే శిల్పం. ఆలయ ప్రధాన ద్వారానికి ఎడమ వైపున ఉండే శిల్పాన్ని వేళ్లతో మీటితే సరిగమపదనిసలు పలుకుతుంది. రామప్ప దేవాలయానికి యునెస్కోవారి గుర్తింపు లభించింది. తెలుగు రాష్ట్రాల్లో వారసత్వ గుర్తింపు పొందిన తొలి కట్టడంగా రామప్ప రికార్డు సృష్టించి విశ్వఖ్యాతినార్జించింది.

ముడుమాల నిలువురాళ్లు