సాహిత్యం

జగము నేలిన తెలుగు

- జయ సూర్య

అమ్మ

ఆంధ్ర, తెలంగాణ రెండు వేరు వేరు రాష్ట్రాలు కావచ్చు. కానీ తెలుగు అనే గొడుగు కింద కలసి మెలసి చేయవలసిన బాధ్యతలు చాలా ఉన్నాయి. రెండు ప్రాంతాలకు చెందిన ఘన చరిత్రను ఆవిష్కరించుకోవాల్సి ఉంది. విశాలాంధ్ర ఏర్పడినా, నేటికీ తెలుగు ప్రజల్లో భాషాభిమాన ఐక్యత అంతంత మాత్రంగానే వుంది. నాడు మద్రాసు నుంచి విడిపడిన హైదరాబాద్ నుంచి బయట పడటం ప్రాంతీయ, పాలనా పరంగా చారిత్రక ఆవశ్యకమైంది. భాషా పరంగా ఆలోచిస్తే తెలుగుకు కన్నడం, తమిళం, ఉర్దూ ఇతర భాషలతో ఉమ్మడి బాంధవ్యం కాలగతిలో ఉండేది.

భాషా ప్రయుక్త రాష్ట్రాలు ఏర్పడిన తర్వాత క్రమేపీ ఆ బాంధవ్యం సన్నగిల్లింది. అదే చారిత్రక బాంధవ్యం సమిష్టి స్ఫూర్తి లేకపోవడం, ఆయా రాష్ట్రాల అస్తిత్వ ధోరణులు ఆపేక్షల కారణంగా కనుమరుగవుతోంది. రాజకీయాలకు అతీతంగా భాషాపరంగా ఆలోచించడం, ప్రతిష్ఠించుకోవడం ఎన్నో సమస్యలతో ముడిపడి వుంది. రాజకీయ రంగంలో అంతగా భాషకు ప్రాధాన్యత లేదు.