കിണ്ടിയുടെ പ്രാധാന്യം

ജലവും പാനീയങ്ങളുമൊക്കെ പകരുന്നതിന് പണ്ടുകാലം മുതൽക്കേ ഉപയോഗിക്കുന്ന പള്ളയിൽ ഒരു കുഴലുള്ള പാത്രമാണ് കിണ്ടി. കീഴ്ഭാഗത്തിനേക്കാൾ വിസ്തൃതി കുറഞ്ഞ വായ, കുറഞ്ഞ അളവിൽ ജലം പകരാൻ പാകത്തിലുള്ള വാൽ എന്ന് വിളിക്കുന്ന കുഴൽ എന്നിവ ഈ പാത്രത്തിന്റെ സവിശേഷതകളാണ്.

- പി.ജെ

ഹൈന്ദവ പൂജാദികർമ്മങ്ങളിൽ കിണ്ടിക്ക് വളരെ വലിയ പ്രാധാന്യമാണുള്ളത്. വെള്ളാട്, ചെമ്പ് എന്നിവ കൊണ്ടുണ്ടാക്കിയ കിണ്ടിയാണ് സാധാരണയായി ഉപയോഗിക്കാറുള്ളത്. എന്നാൽ ഇക്കാലത്ത് സ്റ്റെയിൻലെസ് സ്റ്റീലിന്റെ കിണ്ടികളും കണ്ടുവരുന്നു. കിണ്ടിയുടെ നിത്യോപയോഗം മുൻകാലത്തെ അപേക്ഷിച്ച് ഇപ്പോൾ കുറഞ്ഞിട്ടുണ്ടെങ്കിലും ഹൈന്ദവ വിശ്വാസികളുടെ ഇടയിൽ ആചാരപരമായ പ്രാധാന്യം ഇന്നും ഈ പാത്രത്തിനുണ്ട്.

പയ്യന്നൂരിനടുത്തുള്ള കുഞ്ഞിമംഗലം ഗ്രാമത്തിലെ പാരമ്പര്യമൂശാരിമാരാണ് കിണ്ടി നിർമ്മിക്കുന്നതിൽ കേമന്മാരായി കരുതപ്പെടുന്നത്. വെറും ഒരു പാത്രം എന്നതിലുപരി കിണ്ടിക്ക് ചില ലക്ഷണങ്ങളൊക്കെയുണ്ട്. അതനുസരിച്ചുള്ള കിണ്ടി ഉണ്ടാക്കുന്നതിൽ കുഞ്ഞിമംഗലത്തെ മൂശാരിമാർക്കുള്ളത്രയും കഴിവ് മറ്റാർക്കും ഇല്ലെന്നാണ് പറയപ്പെടുന്നത്. ഇവയെ കുഞ്ഞിമംഗലം കിണ്ടി എന്ന പേരിലാണ് അറിയപ്പെടുന്നത്.