ത്രിമൂർത്തി സംഗമം

കേരളത്തിലെ ഭക്തിചരിത്രത്തിൽ അപൂർവ്വ സ്ഥാനം വഹിക്കുന്ന ക്ഷേത്രമാണ് തിരുവേഗപ്പു റ മഹാക്ഷേത്രം. ക്ഷേത്രഘടനയിലും ഐതിഹ്യമഹത്വത്തിലും വേറിട്ടുനിൽക്കുന്നതാണ് ഈ മതിൽക്കകം. മൂന്ന് മഹാക്ഷേത്രങ്ങൾ, മൂന്ന് കൊടിമരങ്ങൾ ഈ മതിൽക്കകത്ത് കാണാം. പട്ടാ പി വളാഞ്ചേരി പാതയിൽ കുന്തിപ്പുഴയുടെ കരയിലായിട്ടാണ് തിരുവേഗപ്പുറ ക്ഷേത്രം നില കൊള്ളുന്നത്. ഐതിഹ്യകഥകൾ പിന്നിക്കെട്ടിച്ചേർത്ത ഭക്തഹാരമാണ് ഈ ക്ഷേത്രചരിത്രം.

- നാരായണൻ പോറ്റി

തിരുവേഗപ്പുറയിലേയ്ക്ക്

ഐതിഹ്യത്തിലൂടെ തിരുവേഗപ്പുറയിലേയ്ക്ക് എത്താൻ അൽപദൂരം സഞ്ചരിക്കേണ്ടതായിട്ടുണ്ട്. ഐതിഹ്യപാതയിലൂടെ അൽപദൂരം സഞ്ചരിക്കാം. തെക്കേ തേവരും, വടക്കേ തേവരും, നടുവിലവരും, വാഴുന്ന നാലകത്തെ വടക്കേ തേവരിൽ നിന്നും ഐതിഹ്യത്തിലേയ്ക്ക് കടന്നുചെല്ലാം. വടക്കേ തേവർ മഹാവിഷ്ണുവിന്റെ പ്രതിഷ്ഠയുള്ള മഹാക്ഷേത്രമാണ്. ഏകദേശം മൂവായിരം വർഷങ്ങളുടെ ഭക്തിമഹത്വം ഈ ക്ഷേത്രത്തിന് പറയപ്പെടുന്നു. അന്ന് ഈ ക്ഷേത്രപരിസരം അറിയപ്പെട്ടിരുന്നത് "അശോകപുരം എന്നായിരുന്നു. സന്യാസ ആശ്രമങ്ങളാലും ശുദ്ധ വിഷ്ണുഭക്തരാലും നിറഞ്ഞിരുന്ന ഗ്രാമം. ഭക്തിയുടെ ആനന്ദലഹരിയിൽ ദുഃഖം എന്തെന്നറിയാതെ വസിച്ചിരുന്ന ജനത ആയിരുന്നതിനാൽ അശോകപുരം എന്ന് ഈ ദേശത്തെ ഏവരും വിളിച്ചുപോന്നു.