మహాచార్య రామకృష్ణ

భగవంతునికి స్వప్రయోజనం లేకపోయినా, కేవలం జీవులను ఉద్ధరించడం కోసమే కరుణతో మళ్ళీ మళ్ళీ ఈ భువిపై ఆచార్యునిగానో, అవతారంగానో ప్రకటితమవుతూంటాడు.

- - స్వామి సీతేశానంద

భగవంతునికి స్వప్రయోజనం లేకపోయినా, కేవలం జీవులను ఉద్ధరించడం కోసమే కరుణతో మళ్ళీ మళ్ళీ ఈ భువిపై ఆచార్యునిగానో, అవతారంగానో ప్రకటితమవుతూంటాడు.ఈ పవిత్ర భారతావని ఎన్నో భగవదవతారాలకు ఉద్భవస్థానంగా, ఎంతోమంది ఆచార్యులకు జన్మభూమిగా విరాజిల్లింది. వారిచే ధర్మం పునఃస్థాపన చేయబడి ముక్తిధామంగా వర్ధిల్లుతోంది.

ఆచార్యులనగానే మనకు స్ఫురించేవారు ఆదిశంకరాచార్యులు, రామానుజాచార్యులు, మధ్వాచార్యులు, వల్లభాచార్యులు.వీరంతా భగవదంశసంభూతులు, భాష్యకారులు, మార్గదర్శకులుగా వెలుగొందారు. వీరేగాక, చరిత్రకు అందని సమయంలో ఎంతోమంది ఆచార్యులు జన్మించారు. ఇకపై జన్మిస్తారు కూడా! నేటితరానికి మరియు రాబోయే తరాలకు నవీన యుగాచార్యునిగా శ్రీరామకృష్ణులు ఆవిర్భవించారు. స్వయంగా శిష్యులచే ‘ఆచార్యాణామ్ మహాచార్యః', 'అవతారవరిష్ఠ' అని కీర్తించబడ్డారు. శిష్యులు కాబట్టి అలా కీర్తించారేమోనన్న సందేహం తలెత్తుతుంది. కానీ చరిత్ర చూసినట్లయితే, ఏ మహనీయుని గొప్పతనమైనా వారి శిష్య ప్రశిష్యుల ద్వారానే లోకానికి ప్రకటితమవుతుంది. శ్రీరామకృష్ణుల జీవితాన్ని క్షుణ్ణంగా పరిశీలిస్తే, మనం కూడా ఆయనను మహాచార్యునిగా మనస్సులో నిలుపుకుంటాం.