കനകം കുടശ്ശനാടിന്റെ തങ്കം

വീട് നഷ്ടപ്പെട്ട് ഉറ്റവരാൽ ഉപേക്ഷിക്കപ്പെട്ട കുടശ്ശനാട് കനകം . പ്രതിസന്ധികളുടെ കടൽ കടന്നാണ് 'ജയ ജയ ജയ ജയഹേ'യിൽ എത്തുന്നത്. അതിലെ അമ്മവേഷം ഉഷാറാക്കി കനകം പത്തരമാറ്റുള്ള തങ്കമായി മാറി

- സൂരജ് സുകുമാരൻ

നവരസങ്ങൾ വേണോ? അതോ, എക്സ്പ്രെഷൻസ്  മതിയോ... ഫോട്ടോഗ്രാഫർ ക്യാമറ എടുത്തതും കുസൃതിച്ചോദ്യത്തിന്റെ കുടുക്ക കുടശ്ശ നാടുകാരി കനകം പൊട്ടിച്ചു. ജയ ജയ ജയ ജയഹേ'യിലെ തഗ്ഗ് അമ്മ എക്സ്പ്രഷനുകളുടെ ഘോഷയാത്ര തീർത്തു. “മക്കളേ, ഈ അഭിനയം ഇന്നും ഇന്നലെയും തുടങ്ങിയതല്ല. പറയാൻ കഥകൾ കുറേയുണ്ട്... ഹിറ്റ് സിനിമയിലൂടെ മലയാളത്തിലേക്ക് വരവറിയിച്ച് കുടശ്ശനാട് കനകം കഴിഞ്ഞ അഞ്ച് ദശാബ്ദമായി മലയാള നാടകവേദിയിലെ നിറസാന്നിധ്യമാണ്. അഭിനന്ദന പ്രവാഹവുമായി ഫോൺ ഇടതടവില്ലാതെ ശബ്ദിക്കുന്നു. ആ തിരക്കിനിടയിൽ കുടശ്ശനാട്ടെ വാടകവീടിന്റെ മുറ്റത്തിരുന്ന് ജീവിതത്തിന്റെ ഫ്ളാഷ്ബാക്കിലേക്ക് കനകം റീൽ തിരിച്ചു.

കുടശ്ശനാട് എന്ന അഭിമാനം....

പത്തനംതിട്ട പന്തളത്തിനടുത്താണ് കുടശ്ശനാട്. അവിടെ കനകത്തെ അറിയാത്തവർ ഉണ്ടാവില്ല. കാരണം ആ നാട് ഇപ്പോൾ അറിയപ്പെടുന്നത് കനകത്തിന്റെ പേരിലാണ്. “ഈ നാട് എന്റെ ചെറുപ്പം മുതൽ ജീവിതത്തിന്റെ ഓരോ സങ്കട വഴികളിലും കൂടെ നിന്നിട്ടുണ്ട്. അതുപറയുമ്പോൾ കനകത്തിന്റെ മുഖത്ത് അഭിമാനം. “കനകം എന്ന പേര് വിട്ടുപോയാലും കുടശ്ശനാട് എന്നെഴുതാൻ മറക്കരുത്. കാരണം കനകമ്മയെ ഇന്നറിയപ്പെടുന്ന കനകം ആക്കിയത് ഈ നാടാണ്. ഈ നാട്ടുകാർക്ക് ഞാൻ കൊടുത്ത വാക്കാണ് കുടശ്ശനാടിന് അഭിമാനിക്കാനുള്ള വക ഉണ്ടാക്കി കൊടുത്തിട്ടേ ഞാൻ മരിക്കുള്ളൂന്ന്, ജയജയ ജയ ജയഹേ' ഇറങ്ങുന്നതുവരെ ആരോടും അതിനെ കുറിച്ചൊന്നും മിണ്ടിയില്ല. സിനിമ ഇറങ്ങാറായപ്പോൾ ഒരു സർപ്രൈസ് ഉണ്ടെന്ന് എല്ലാവരോടും പറഞ്ഞു. റിലീസിന്റെ തലേന്ന് കിടന്നിട്ട് ഉറക്കം വന്നില്ല. നാളെ എന്താവും എന്ന ടെൻഷൻ. ആദ്യ ഷോ കഴിഞ്ഞത് മുതൽ പിന്നെ ഞാൻ നിലത്തൊന്നും അല്ലായിരുന്നു. എല്ലാവരും വിളിക്കുന്നു, അഭിനന്ദിക്കുന്നു. അനുമോദ നങ്ങൾ.. ആശംസബോർഡുകൾ. കുടശ്ശനാട്ടിലെ 95 ശതമാനം പേരും ജയ ജയ ജയ ജയഹേ' കണ്ടു. ഞാൻ നാടിന് കൊടുത്ത വാക്കും പാലിച്ചു.

സീൻ-ഒന്ന്
പൂതനയുടെ കഴുത്തിന് പിടിച്ച കൃഷ്ണൻ....

പെൺവേഷവും ആണുങ്ങൾ തന്നെ കെട്ടിയിരുന്ന ഒരു നാടക കാലമുണ്ടായിരുന്നു കേരളത്തിന്റെ ഇന്നലെകളിൽ. അന്നും കനകം അരങ്ങിലുണ്ട്.