முத்துமாலையைக் கழற்றிக் கொடுத்த ராஜா! - அகிலாண்ட பாரதி

ஊரெங்கும் மகளிர் உரிமைத்தொகை பற்றிய பேச்சாகவே இருக்கிறது. எனக்கு வந்துவிட்டது, உனக்கு வந்திருக்கிறதா என்பதில் தொடங்கி, அவசியமா அவசியம் அற்றதா, பெண்களுக்கு எந்தெந்த விதங்களில் அது பயனளிக்கும், நாட்டின் பொருளாதார நிலைமைக்கு இந்தத் திட்டத்தால் என்ன தீங்கு வரும் என்பது வரை பல விவாதங்கள் நடைபெறுகின்றன.

இவற்றுக்கு மத்தியில் இந்தத் தொகையைப் பெறும் பெண்கள் எந்த விதமான செலவிற்கு இதை பயன்படுத்துவார்கள் என்ற கேள்வி எனக்குள் எழுந்தது.

நான் அரசுப் பணியில் சேர்ந்த புதிதில், டாக்டர் முத்துலட்சுமி ரெட்டி திட்டத்தின் கீழ் கர்ப்பிணிப் பெண்ணுக்கு ஒரே தவணையாக ஐநூறு ரூபாய் அரசாங்கத்திலிருந்து கொடுப்பார்கள். அது அவளது பிரசவச் செலவிற்கு பயன்படும் என்பதுதான் நோக்கம்.

போகப் போக தொகை அதிகரிக்கப்பட்டது. ஒரு கட்டத்தில் கருவுற்றிருக்கும் காலம் முழுவதற்கும் மாதா மாதம் இவ்வளவு தொகை என்று கணக்கிட்டு வழங்கினார்கள். அதிகபட்சமாக 18 ஆயிரம் ரூபாய் கொடுத்தது வரை திட்டத்தை நான் கவனித்து வந்தேன். அதன் பின் அதில் என்ன நடக்கிறது என்பது என் கருத்திற்கு எட்டவில்லை.

ஒருமுறை தொகை அதிகமாக்கப்பட்ட போது அது குறித்த அறிமுகக் கூட்டம் ஒன்று நடத்தப்பட்டது. கர்ப்பிணிப் பெண்கள் பலர் வந்திருக்க, அவர்களுக்கு சமுதாய வளைகாப்பு நடத்தி கர்ப்பிணிப் பெண்களுக்கான உதவித்தொகை காசோலையும் வழங்கினோம். நிகழ்ச்சிக்கு வந்திருந்த உயர் அதிகாரி ஒருவர், "பணம் கிடைச்ச உடனே நீங்க என்ன செலவு செய்வீங்க?" என்று அங்கிருந்த பயனாளர்களிடம் கேட்டார்.