பாராளுமன்றத்துக்குள் குண்டு...காரணம் என்ன?

இந்தியாவில் மிகவும் பாதுகாப்பான இடம் பாராளுமன்றம். காரணம் அது பெருமபான்மை மக்களின் ஆதரவு பெற்ற பிரதிநிதிகளின் சபை. ஆனால், அங்கும் எளிதாக நுழையமுடியும் என்று கடந்த 2001 டிசம்பர் 13ல் 5 பயங்கரவாதிகள் நிருபித்தனர்.

- நெல்லை பரிதி

அவர்கள் நடத்திய துப்பாக்கிச்சூட்டில் 9 பேர் பலியாகினர். பதிலுக்கு பாதுகாப்பு படையினர் நடத்திய துப்பாக்கிச்சூட்டில் 5 பயங்கரவாதிகளும் வீழ்த்தப்பட்டனர். அது இந்திய ஜனநாயக வரலாற்றின் கருப்பு நாளாக பதிவாகிவிட்டது.

நாடாளுமன்றத் தாக்குதல் நடந்த 22ஆவது ஆண்டு நினைவு தினம் சமீபத்தில் அனுசரிக்கப்பட்டது. பிரதமர் மோடி, மத்திய அமைச்சர்கள், எம்பிக்கள் என அனைவரும் 2001 பயங்கரவாத தாக்குதலில் இறந்தவர்களுக்கு அஞ்சலி செலுத்தினர்.

அதையடுத்து வழக்கம்போல் குளிர்கால கூட்டத்தொடர் தொடங்கியது. அப்போது லோக்சபா பார்வையாளர் மாடத் தில் இருந்து திடீரென 2 பேர் அரங்குக்குள் குதித்து, மஞ்சள் நிற ஸ்பிரேயை அடித்தவாறே சபாநாயகர் இருக்கையை நோக்கி ஓடினர். அவர்களை அங்கிருந்த எம்பிக்கள் பிடித்து பாதுகாவலர்களிடம் ஒப்படைத்தனர்.

அவர்களை கைது செய்து வெளியே கொண்டுவந்த வேளை, விஐபிக்கள் நுழைவாயில் பகுதியில் நின்று மஞ்சள் நிற ஸ்பிரே அடித்தவாறே 'அடக்குமுறை ஒழிக' என இரண்டு பெண்கள் முழக்கமிட்டனர். அவர்களும் கைது செய்யப்பட்டனர்.