என்னோட எல்லை எனக்கு தெரியும்

தமிழில் அறிமுகமாகி பல வருடங்கள் ஓடி விட்டாலும் 'நிகிலா விமலுக்கு வாழை படத்தின் பூங்கொடி டீச்சர்' கேரக்டர்தான் தனி அடையாளத்தை கொடுத்துள்ளது. நடன ஆசிரியரின் மகளான நிகிலாவுக்கு பரதம், குச்சுப்புடி பாரம்பரியக் கலைகள் அனைத்தும் அத்துப்படி. தமிழ், மலையாள சினிமாவில் பரபரப்பாக இருக்கும் நிகிலாவுடன் ஒரு அழகான சிட்சாட்.

- நிகிலா விமல்

நல்ல கதாப்பாத்திரங்களை எப்படி தேர்வு செய்யுறீங்க?

கடந்த 15 வருஷமா நான் சினிமா துறையில் இருக்கேன். ஆனால் இப்போவரைக்கும் 20 படங்கள் தான் நடிச்சிருக்கேன். எனக்கு பொருத்தம் இல்லாத கதைகளில் நான் நடிச்ச்தில்ல. சில நேரங்களில் பெரிய தயாரிப்பு நிறுவனங்களுக்காக, பெரிய நடிகர்களுக்காக சில புராஜெக்ட்ஸ் ஓகே பண்ணியிருக்கேன். ஆனா, என்னோட ரோல் நல்லதா இருக்கணும் 'ங்கிறதுல உறுதியா இருப்பேன்.

சினிமாவில் நீங்க கத்துக்கிட்ட அனுபவங்கள் பற்றி?

வாழ்க்கையில் நான் கத்துக்கிட்ட அனுபவங்களைத் தான் சினிமாவில் பிரதிபலிச்சிட்டு இருக்கேன். என் கூட நடிச்சவங்க மற்றும் நான் வொர்க் பண்ண படக்குழுவிடம் இருந்தும் நிறைய விஷயங்களை கத்துக்கிட்டேன். என்னை இந்த உயரத்திற்கு கொண்டு வந்திருக்கும் படங்களுக்கும், படக்குழுவினருக்கும் நான் நன்றிக்கடன் பட்டிருக்கேன்.

உங்க சினிமா வாழ்க்கையின் ஆரம்ப கட்டம் பற்றி?

ஆரம்பத்தில் நான் சில படங்களில் நடிச்சேன். ஒரு படத்தில் நடிக்கும் போது என்ன மாதிரி இமேஜ் கிடைக்கும் 'ன்னு எனக்கு அப்போ ஐடியா கிடையாது. ஆரம்பத்தில் நானும், என் அம்மாவும், ஒரு தமிழ் பட ஷூட்டிங்குக்காக சென்னை வந்தோம். ஆனா படப்பிடிப்பு பாதியில் நின்னுடுச்சு. படக்குழுவில் இருந்து ஒருத்தர், எங்களை ட்ரெயினில் ஏற்றி ஊருக்கு அனுப்பினார். டிக்கெட் ஆல்ரெடி புக் பண்ணிட்டதா சொன்னார்.

ஆனா, டி.டி.இ வந்து டிக்கெட்டும் இல்ல, ரிசர்வேஷனும் இல்லன்னு சொன்னார். அப்போ எங்ககிட்ட கையில் காசும் கம்மியா இருந்தது. எனக்கு இப்போவும் ஞாபகம் இருக்கு, என் அம்மா அழுதுகிட்டே, அவங்க கொண்டு வந்த பையில், சில்லறை காசெல்லாம் சேர்த்து எண்ணிட்டு இருந்தாங்க. அதை என்னால மறக்கவே முடியாது.