ஒருதலை காதலால் உருவான மாப்பிள்ளை யுத்தம்!

மன்னர்கள் கடவுளராக வணங்கப்பட்டது மறுக்கத்தக்கதல்ல. அப்படி ஒரு மன்னனைத்தான் தென் மாவட்டங்களாம் குமரி, திருநெல்வேலியில் குல தெய்வமாக வணங்கிவருகின்றனர். அவன் தான் குலசேகரன்.

- பரிதி

குலசேகரன் என்றதும் தெலுங்கு கங்கை சோழர்களை வென்று வீராபிஷேகம் செய்த குலசேகரப் பாண்டியன் தான் நினைவுக்கு வருவான். ஆனால், இவன் அவனுக்கு பின்வந்த வேறு இரு குலசேகரர்களுள் ஒருவனாக இருக்கவேண்டும்.

ஏனெனில், இவன் காதலுக்காக மடிந்தவன். இவன் குலதெய்வம் மூன்று முகம் கொண்டாள் என்றும் வழங்கப்படுகின்ற மூன்று யுகம் கொண்டாள்.

அந்த மூன்று முகம் கொண்ட அம்மன் வழிபடப்படும் இடங்களில் எல்லாம் மூன்று துணை தெய்வங்கள் இருக்கிறார்கள். அவர்கள் தாம் சகுலசேகரத் தம்புரான், வடுகச்சி அம்மன், வீணாதி வீணன்.

இந்த மூவரையும் ஒரு காதல் கதை இணைக்கிறது. அக்கதை வீணாதி வீணன், ஐவர் ராஜாக்கள் வில்லுப்பாட்டிலும், வடுகச்சி அம்மன் கதைப்பாட்டிலும் இருக்கிறது.

அரியலூர் மேலக்கருப்பூர், சிவகங்கை காடனேரி உள்ளிட்ட சில இடங்களிலும் வடுகச்சி அம்மன் கோயில் உள்ளது. அந்த வடுகச்சி அம்மன்களை விட தனித்துவமாக திருநெல்வேலி மாவட்டம் வடுகச்சி மதிலில் உள்ள வடுகச்சி அம்மன் கதை துலங்குகிறது.

குலசேகரன் என்ற மன்னனின் வாழ்க்கையோடு தான் இந்த வடுகச்சியும் வீணாதி வீணனும் தொடர்பு படுகிறார்கள்.

காஞ்சிபுரத்தை ஆண்டு வந்த மன்னன் பாண்டியராஜாவுக்கும் அவரது மனைவி மாலையம்மாளுக்கும் பிள்ளை இல்லையே என்கிற ஏக்கம் இருந்தது.