அதிகரிக்கும் மால்கள்... மூடப்படும் சிறு கடைகள்!

கடந்த சில ஆண்டுகளாக சில்லறை வர்த்தகத்தில் அந்நிய நேரடி முதலீட்டு விதிமுறைகளை மத்திய அரசு தளர்த்தியதன் மூலம் ஷாப்பிங் மால்களின் எண்ணிக்கையும் வருமானமும் இந்தியாவில் பெரும் வளர்ச்சியை அடைந்துள்ளது.

- எஸ்.ரவீந்திரன்

இந்நிலையில் இந்தியாவின் மிகப்பெரிய சில்லறை விநியோகஸ்தர்கள் சங்கமான அகில இந்திய நுகர்வோர் பொருட்கள் விநியோகஸ்தர்கள் கூட்டமைப்பு ஒரு அறிக்கை வெளியிட்டுள்ளது. அதில் கூறியுள்ளதாவது:

இந்தியாவில் சுமார் 13 மில்லியன் பலசரக்கு கடைகள் இருப்பதாக மதிப்பிடப்பட்டுள்ளது. அவற்றில் 10 மில்லியனுக்கும் அதிகமான பெட்டிக் கடைகள் சிறிய நகரங்களில் உள்ளன. கடந்த இரண்டு-மூன்று ஆண்டு களுடன் ஒப்பிடும்போது பலசரக்கு கடைகளுக்கு வாடிக்கையாளர்கள் வருகை, இந்த ஆண்டு கிட்டத்தட்ட பாதியாகக் குறைந்துள்ளது. இந்த பண்டிகைக் காலத்தில் பலசரக்கு கடைகளின் விற்பனை தேக்க நிலையில் உள்ளது. இதன்காரணமாக நகரங்களில் மட்டும் 90,000 கடைகள் மூடப்பட்டுள்ளன.

முதல் தர நகரங்களில் 60,000 கடைகள் மூடப்பட்டுள்ளன. இரண்டு மற்றும் மூன்றாம் கட்ட நகரங்களில் கூடுதலாக 50,000 கடைகள் மூடப்பட்டுள்ளன. மொத்தத்தில் நாடு முழுவதும் கிட்டத்தட்ட 2,00,000 பெட்டிக் கடைகள் மூடப்பட்டுள்ளன. இவ்வாறு அதில் தெரிவிக்கப்பட்டுள்ளது.