സാംബശിവന്റെ പകരക്കാരൻ

വഴിത്തിരിവ് ആലപ്പി രമണൻ

- ഉമ ആനന്ദ്

ദാരിദ്ര്യം കാരണം ഹൈസ്കൂൾ വിദ്യാഭ്യാസം പാതി വഴിയിലുപേക്ഷിച്ചെങ്കിലും പുസ്തകങ്ങളെ ചങ്ങാതിമാരാക്കിയ  ബാല്യകൗമാരം. വായനയുടെ അറിവിലും ബലത്തിലും കഥപറഞ്ഞ് തുടങ്ങിയ യൗവനം.

അരങ്ങേറ്റത്തിന് തന്നെ മാനസ ഗുരുവിന്റെ അനുഗൃഹീത സാന്നിദ്ധ്യം. ഗുരുവിന് പകരക്കാരനായി കഥ പറയാൻ ലഭിച്ച അപൂർവ ഭാഗ്യം. മരണം വരെ ഗുരുവിന്റെ നിഴലായിത്തുടരാനുള്ള നിയോഗം. കഥാപ്രസംഗ ലോകത്തെ കുലപതി വി. സാംബശിവന്റെ പ്രിയ ശിഷ്യനും കഥാകഥനത്തിൽ അര നൂറ്റാണ്ട് പിന്നിട്ട് കലാകാരനുമായ ആലപ്പി രമണൻ തന്റെ സ്വന്തം കഥ പറയുന്നു.

 "ഞാനിന്ന് അയ്യായിരത്തോളം വേദികളിൽ കഥാപ്രസംഗം അവതരിപ്പിച്ചിട്ടുണ്ടെങ്കിൽ അതിന് കാരണക്കാരൻ എന്റെ അച്ഛൻ തന്നെയാണ്.

ആലപ്പുഴയിലെ കയർ തൊഴിലാളി ആയിരുന്ന എന്റെ അച്ഛൻ ജി. പദ്മനാഭനും അമ്മ പെണ്ണമ്മയ്ക്കും ഞങ്ങൾ അഞ്ചു മക്കൾ. നാലാണും ഒരു പെണ്ണും. രണ്ടാമത്തെ മകനായിരുന്നു ഞാൻ. എന്റെ അച്ഛൻ മഹാകവി കുമാരനാശാന്റെ കടു ആരാധകനായിരുന്നു. കവി പങ്കെടുക്കുന്ന പരിപാടികളിൽ സ്ഥിരം ശ്രോതാവായിരുന്നു. വീട്ടിൽ ആശാന്റെ കവിതകൾ ചൊല്ലുന്നത് അച്ഛന്റെ പതിവായിരുന്നു.