കമല നെഹ്റു

ഇതിഹാസത്തിലെ സ്ത്രീകൾ

- കണക്കൂർ ആർ. സുരേഷ്കുമാർ

ഇന്ത്യ കണ്ട ഏറ്റവും മികച്ച ഭരണാധികാരിയും ആധുനിക ഇന്ത്യയുടെ ശിൽപികളിൽ ഒരാളുമായ ജവഹർലാൽ നെഹ്റുവിന്റെ പത്നിയും മുൻ പ്രധാന മന്ത്രി ഇന്ദിരാഗാന്ധിയുടെ മാതാവുമായ കമല കൗൾ എന്ന കമല നെഹ്റുവിന് ഭാരത ചരിത്രത്തിലെ സ്ത്രീകൾക്കിടയിൽ വലിയ സ്ഥാനമാണുള്ളത്. കുടുംബത്തിന്റെ പ്രാധാന്യം കൊണ്ടു മാത്രമല്ല, സ്വാതന്ത്ര്യ സമര നേതാവെന്ന നിലയിലും കമലയുടെ സ്ഥാനം വലുതാണ്.

പഴയ ഡൽഹിയിലെ ഒരു കാശ്മീരി പണ്ഡിറ്റ് കുടുംബത്തിലായിരുന്നു 1899 -ൽ കമല ജനിച്ചത്. അവൾക്ക് രണ്ടു സഹോദരന്മാരും ഒരു സഹോദരിയും ഉണ്ടായിരുന്നു. കമലയായിരുന്നു മൂത്തവൾ. എങ്കിലും കുട്ടിക്കാലത്ത് വളരെ നാണം കുണുങ്ങിയും ശാന്തശീലയുമായ ഒരു കുട്ടിയായിരുന്നു അവൾ. കമല 1916-ൽ, തന്റെ പതിനേഴാം വയസ്സിൽ ജവഹർലാൽ നെഹ്റുവിന്റെ ഭാര്യയായി. വെസ്റ്റേൺ കൾച്ചറിലുള്ള നെഹ്റു കുടുംബത്തിന്റെ അന്തരീക്ഷത്തിൽ എത്തിപ്പെട്ടത് കമലയ്ക്ക് ആദ്യം ചില പ്രശ്നങ്ങളുണ്ടാക്കി. അക്കാലത്ത് ഇംഗ്ലീഷ് ഭാഷ കൈകാര്യം ചെയ്യാൻ പോലും അവൾക്ക് പരിമിതികളുണ്ടായിരുന്നു. എ ന്നാൽ അക്കാലത്തു തന്നെ നെഹ്റു രാഷ്ട്രീയ കാര്യങ്ങളിലും ഇന്ത്യയുടെ സ്വാതന്ത്ര്യ സമര രംഗത്തും സജീവമായിരുന്നു.