മെസലീന

ഇതിഹാസത്തിലെ സ്ത്രീകൾ

-  കണക്കൂർ ആർ. സുരേഷ്കുമാർ

റോമൻ ചക്രവർത്തിയായിരുന്ന ക്ലോഡിയസ്സിന്റെ മൂന്നാം ഭാര്യയായിരുന്നു വലേരിയ മെസലീന. ഈ മഹതിക്ക് ചരിത്രത്തിലുള്ള സ്ഥാനം ചെറുതൊന്നുമല്ല. നീറോ ചക്രവർത്തിയുടെ പിതൃസഹോദരി, അഗസ് ചക്രവർത്തിയുടെ മുത്തശ്ശി... എന്നിങ്ങനെ നീളുന്നു ആ പട്ടിക. എന്നാൽ പല കാരണങ്ങൾ കൊണ്ടും മെസലീന കുപ്രസിദ്ധി നേടി. അവളുടെ അടങ്ങാത്ത ലൈംഗികതൃഷ്ണയാണ് അതിൽ പ്രധാനപ്പെട്ടത്. ലൈംഗികതൃഷ്ണയുടെ പേരിൽ എന്തും ചെയ്യാൻ അവൾ മടിച്ചില്ല. അതി സാഹസികമായ പ്രവൃത്തികളായിരുന്നു അവളുടേത്. അവൾ സ്വന്തമായി വേശ്യാലയം പോലും നടത്തിയിരുന്നു എന്നും പറയപ്പെടുന്നു.

ഡൊമിഹ്യ ലെപിഡ- മാർക്കസ് വലരിയസ് ദമ്പതികളുടെ മകളായി എ.ഡി.പതിനേഴാം ആണ്ടിൽ ജനിച്ചു. എന്നാൽ അവളുടെ ചെറുപ്പകാലത്തെ ജീവിതത്തെ കുറിച്ച് അധികം അറിവുകൾ ലഭ്യമല്ല. അവൾക്ക് 38 വയസ്സുള്ളപ്പോൾ ക്ലോഡിയസ്സ് അവളെ വിവാഹം ചെയ്തു. കലിഗുല ചക്രവർത്തി കൊല്ലപ്പെട്ടപ്പോൾ ക്ലോഡിയസ്സ് പുതിയ ചക്രവർത്തിയായി. അങ്ങനെ മെസലീന ചകവർത്തിനിയുമായി. അധികാരം ലഭിച്ചതിന് ശേഷമാണ് മെസലീന പല കാരണങ്ങളാലും അറിയപ്പെട്ടു തുടങ്ങിയത്.

ലൈംഗിക ആരോപണങ്ങളായിരുന്നു കൂടുതലായി ഉണ്ടായത്. അതുപോലെ, സാമ്രാജ്യ കുടുംബങ്ങളിലെ അംഗങ്ങളോടുളള മോശം പെരുമാറ്റം, സെനറ്റോറിയൻ അംഗങ്ങളോടുള്ള ക്രൂരത, ഭീകരമായ ഗൂഢാലോചനകൾ തുടങ്ങിയ നിരവധി പ്രശ്നങ്ങൾ അവൾക്കുമേൽ ആരോപിക്കപ്പെട്ടിട്ടുണ്ട്.