ഇനി മക്കൾ സിനിമാ കാലം

ഔട്ട് ലുക്ക്

- പ്രേം ടി. നാഥ്

മലയാള സിനിമയിലെ പ്രശസ്തരായ താരങ്ങളുടെയും സംവിധായകരുടെയും പാത പിൻ തുടർന്ന് അവരുടെ മക്കൾ ഈ രംഗത്തേ കടന്നുവരുന്ന ട്രെൻഡ് തുടരുകയാണ്. ഇത് ഇന്ത്യൻ സിനിമയിൽ ഏത് ഭാഷകളിലും കാണുന്ന കാഴ്ച തന്നെ. മലയാളത്തിൽ ഹരിത നായകൻ പ്രേംനസീറിന്റെ മകൻ ഷാനവാസ് മുതൽ പലരും ഈ രംഗത്ത് പരീക്ഷണം നടത്തി പിടിച്ചു നിൽക്കാൻ കഴിയാതെ പിന്മാറിയവരാണ്. ഇന്ന് മലയാള സിനിമയുടെ സമസ്ത മേഖലയിലും മക്കൾ നില ഉറപ്പിച്ചു വിജയം നേടുന്നു എന്നതാണ് യാഥാർത്ഥ്യം. അതിൽ താരങ്ങളായിരുന്ന സുകുമാരൻ മല്ലിക ദപതിമാരുടെ മകൻ പൃഥിരാജാണ് ഈ നിരയിൽ വൻ വിജയം നേടിയത്. രഞ്ജിത്തിന്റെ നന്ദനം സിനിമയിലൂടെ നടനായി തുടക്കം കുറിച്ച പൃഥിക്ക് സംവിധാനത്തിലും അഭിനയത്തിലും ഒരുപോലെ ശോഭിക്കാൻ കഴിഞ്ഞിട്ടുണ്ട്.