ഉമ്മൻ ചാണ്ടി: ജനനായകനാകാൻ ഭൂമിയിൽ പിറന്ന ജനനായകൻ

മറ്റാരേക്കാളും എന്നെ ഏറെ ആകർഷിക്കുകയും ചിന്തിപ്പിക്കുകയും ചെയ്ത ജനനേതാവാണ് ഉമ്മൻ ചാണ്ടി സാർ

- റവ. ജോർജ് മാത്യു പുതുപ്പള്ളി

മറ്റാരേക്കാളും എന്നെ ഏറെ ആകർഷിക്കുകയും ചിന്തിപ്പിക്കുകയും ചെയ്ത ജനനേതാവാണ് ഉമ്മൻ ചാണ്ടി സാർ. പുതുപ്പള്ളി പള്ളി വക എൽ.പി. സ്കൂളിൽ ഞാൻ പഠിക്കുന്ന കാലം മുതൽ കേട്ടുപഴകിയ മുദ്രാവാക്യമാണ് ഉമ്മൻ ചാണ്ടീ നേതാവേ, ധീരതയോടെ നയിച്ചോളൂ' എന്നത്. അന്ന് അദ്ദേഹം അഖില കേരള ബാലജനസഖ്യത്തിന്റെയും കെ.എസ്.യു. പ്രസ്ഥാനത്തിന്റെയും അനിഷേധ്യനേതാവായി കത്തിജ്വലിച്ചു നിൽക്കുന്ന സമയമായിരുന്നു.

ഞങ്ങൾ കൊച്ചുകുട്ടികൾ കളിക്കുന്ന സമയത്ത് ആ മുദ്രാവാക്യം സ്ഥിരമായി മുഴക്കുമായിരുന്നു.

എന്റെ വീടിന് ഒരു വിളിപ്പാട് അകലെയായിരുന്നു ഉമ്മൻ ചാണ്ടി സാറിന്റെ വീട്. അഞ്ചാം ക്ലാസ് മുതൽ ഏഴാം ക്ലാസ് വരെ ഞാൻ പഠിച്ചിരുന്നത് അദ്ദേഹത്തിന്റെ സ്കൂളിലായിരുന്നു. അന്ന് അൾത്താരബാലനായിരുന്ന എന്നെ ഒ.സി. സാറിന്റെ പരമഭക്തയും എളിമയുടെ പര്യായവുമായിരുന്ന അമ്മ ബേബിയമ്മച്ചിക്ക് ഒത്തിരി ഇഷ്ടമായിരുന്നു.

ഉന്നതകുലജാതരായ ആ കുടുംബാംഗങ്ങൾക്ക് എങ്ങനെയാണ് ഇത്രയേറെ വിനയവും താഴ്മയും പരസ്നേഹവും കാരുണ്യവും അസൂയയും അഹങ്കാരവും ഇല്ലാത്ത പ്രകൃതവും ലഭിച്ചതെന്ന് പലപ്പോഴും അത്ഭുതത്തോടെ ഞാൻ ചിന്തിച്ചിട്ടുണ്ട്. ദൈവകൃപയും ആഭിജാത്യവും കുലമഹിമയും മാത്രമാണ് അതിന് കാരണമെന്ന് ഞാൻ വിശ്വസിക്കുന്നു.

എന്റെ ഭക്തയായ അമ്മയുമായി നല്ല സൗഹൃദം പുലർത്തിയിരുന്ന വ്യക്തിയാണ് ഒ.സി. സാറിന്റെ അമ്മ ബേബിയമ്മച്ചി. മിക്ക വെള്ളിയാഴ്ചയും ഞാനും അമ്മയും ബേബിയമ്മച്ചിയും കൂടിയാണ് പുതുപ്പള്ളി പള്ളിയിൽ പ്രാർത്ഥിക്കാൻ പോയിരുന്നത്.

ഞാൻ വൈദികപട്ടമേറ്റ് ദിവസം ബേബിയമ്മച്ചി പള്ളിയിൽ വരികയും എന്റെ കൈയിൽ നിന്ന് കുർബാന സ്വീകരിക്കുകയും ചെയ്തു.

ഒ.സി. സാറിന്റെ സ്കൂളിൽ ഞാൻ പഠിക്കുമ്പോൾ എന്റെ അമ്മ വാഴയിലയിൽ പൊതിഞ്ഞുതരുന്ന ചോറും കറിയും ഒ.സി. സാറിന്റെ വീട്ടിലിരുന്നാണ് ഞാൻ കഴിച്ചിരുന്നത്.