പുതുമകളോടെ പുതുവർഷം

2023 എന്ന പുതിയ വർഷം പിറക്കുന്ന ഈ വേളയിൽ പ്രതീക്ഷകളുടെ ഗിരിശൃംഗങ്ങളിലാണ് നാം ഏവരും. ആശങ്കകളും ആകുലതകളും ഏറെയാണ്. പുതുവർഷത്തിന്റെ ഫലത്തിൽ എന്തൊക്കെ നന്മകളാണ് കാലം കരുതിവച്ചിരിക്കുന്നത്...

- ജി. കൃഷ്ണൻ

കാലത്തിന്റെ 2022 കൊഴിഞ്ഞുവീണു. പ്രായം ഒരു വയസ്സുകൂടി പിന്നിടുന്നു.

2023 എന്ന പുതിയ വർഷം പിറക്കുന്ന ഈ വേളയിൽ പ്രതീക്ഷകളുടെ ഗിരിശൃംഗങ്ങളിലാണ് നാം ഏവരും. ആശങ്കകളും ആകുലതകളും ഏറെയാണ്. പുതുവർഷ ഫലത്തിൽ എന്തൊക്കെ നന്മകളാണ് കാലം കരുതിവച്ചി രിക്കുന്നതെന്ന് ആർക്കറിയാം ?

സന്തോഷത്തിന്റെയും ഐശ്വര്യത്തിന്റേയും ദിനങ്ങളാകട്ടെ ഇനി വരാൻ പോകുന്നതെന്ന് പ്രാർത്ഥനയുമായി എല്ലാവരും 2023 നെ വരവേൽക്കുമ്പോൾ ഇന്നിവിടെ കണ്ടുമുട്ടിയ കല്യാണിയോടും ശ്രീദേവിയോടുമായി ചോദിച്ചത് യവനിക വീഴുന്ന 2022 നെക്കുറിച്ചും ഉയരുന്ന 2023 നെക്കുറിച്ചുമാണ്.

ശ്രീദേവി പറഞ്ഞു.

2022 എന്നെ സംബന്ധിച്ചിടത്തോളം പുതുമ നിറഞ്ഞ ഒരു വർഷമായിരുന്നു. പലതുകൊണ്ടും പ്രതീക്ഷിച്ചതിലും ഭംഗിയായി നല്ല അനുഭവങ്ങൾ തന്നെ ഒരു വർഷമാണ്. പുതിയ പുതിയ ചില പരിപാടികളും പദ്ധതികളും തുടങ്ങിവയ്ക്കുവാൻ സാധിച്ചു. പുതിയ ചില സുഹൃദ് ബന്ധങ്ങൾ കിട്ടി. പുതിയ കുറെ ഷോകളിൽ പങ്കെടുക്കാൻ കഴിഞ്ഞു.

സീരിയലിൽ അഭിനയിക്കുന്നുണ്ടെങ്കിലും സിനിമയാണന്റെ ലക്ഷ്യം. അത് 2023 ൽ നടക്കുമെന്ന പ്രതീക്ഷയിലും ആഗ്രഹത്തിലുമാണ് ഞാൻ.

വിദേശത്തായിരുന്ന കല്യാണിയും കുടുംബവും തിരുവനന്തപുരത്ത് എത്തിയിട്ട് ഇപ്പോൾ കുറച്ചുനാളുകളെ ആയിട്ടുള്ളൂ. കോളേജ് പഠനം ഇവിടെയാകണമെന്നതായിരുന്നു കല്യാണിയുടെ ആഗ്രഹം. പഠിത്തവും പരി ക്ഷയും ഒക്കെയായി തിരക്കിലായിരുന്ന കല്യാണിക്കുമുണ്ട് ഒരു കൊച്ചു സിനിമാമോഹം. അതുകൊണ്ടു തന്നെയാണിപ്പോൾ ഈ ഫോട്ടോഷൂട്ടിൽ പങ്കെടുക്കാമെന്ന് തീരുമാനിച്ചത്. 2022 എനിക്ക് നല്ലൊരു വർഷമായിരുന്നുവെന്ന് പറഞ്ഞുതുടങ്ങിയ കല്യാണി തുടർന്നു.

2021 ലാണ് ഞാൻ തിരുവനന്തപുരത്തു വന്ന് കോളേജിൽ ജോയിൻ ചെയ്തത്. കോവിഡ് കാരണം ആദ്യം കുറച്ചുനാൾ ഒൺലൈൻ ക്ലാസായിരുന്നു. 2022 പൂർണ്ണമായും ഓഫ്ലൈൻ ക്ലാസ് നടന്നു. കോളേജിൽ പോയി കോളേജ് ജീവിതം എൻജോയ് ചെയ്യാൻ കഴിഞ്ഞു എന്നുള്ളതാണ് എനിക്ക് 2022 നൽകിയ ഏറ്റവും വലിയ സന്തോഷം. കാരണം അത്രയും ആഗ്രഹിച്ച് നാട്ടിൽ വന്ന് കോളേജിൽ ചേർന്നതാണ്. മാർ ഇവാനിയോസ് കോളേജിൽ ബികോം സെക്കന്റ് ഇയറിന് പഠിക്കുന്നു. കോളേജ് ലൈഫ് ഞാനിപ്പോൾ മാക്സിമം എൻജോയ് ചെയ്യാൻ ശ്രമിക്കുന്നുണ്ട്.