പുതിയ ഓണത്തിന്റെ പൊൻതിളക്കവും പൊൻവെട്ടവും

വിഷ്ണു ഉണ്ണികൃഷ്ണനും ബിബിൻ  ജോർജ്ജും ചേർന്ന് ആദ്യമായി സംവിധാനം ചെയ്ത സിനിമയാണ് "വെടിക്കെട്ട്

- ജി. കൃഷ്ണൻ

ഐശ്വര്യ അനിൽ കഴിഞ്ഞവർഷം ഇതേസമയം ഒരു സാധാരണ പെൺകുട്ടി മാത്രമായിരുന്നു. എന്നാൽ, ഈ വർഷം അങ്ങനെയല്ല, ഒരു അസാധാരണത്വം തന്നെയുണ്ട്.

അതെന്താണെന്ന് പറയുംമുമ്പേ മറ്റൊരു കാര്യം വ്യക്തമാക്കേണ്ടതുണ്ട്. ചലച്ചിത്രനടനും തിരക്കഥാകൃത്തുമായ വിഷ്ണു ഉണ്ണികൃഷ്ണൻ കഴിഞ്ഞ വർഷം ഇതേസമയം, അതായത് കഴിഞ്ഞ തിരുവോണനാളിൽ തന്റെ പുതിയ സിനിമയിലെ നായികയോട് പറഞ്ഞ ഒരു വെടിക്കെട്ട്  ഡയലോഗുണ്ട്..   

"സാധാരണക്കാരിയായ ഐശ്വര്യയുടെ അവസാനത്തെ ഓണം അല്ലേ?'

 ആ വാക്കുകൾ എന്റെ മനസ്സിൽ വല്ലാതെ സ്ട്രൈക്ക് ചെയ്തുവെന്ന് ഐശ്വര്യ അനിൽ പറയുന്നു.

വിഷ്ണു ഉണ്ണികൃഷ്ണനും ബിബിൻ  ജോർജ്ജും ചേർന്ന് ആദ്യമായി സംവിധാനം ചെയ്ത സിനിമയാണ് "വെടിക്കെട്ട്. ആ സിനിമയിലെ നായിക ഐശ്വര്യയാണ്. അന്ന് വിഷ്ണു പറഞ്ഞ വാക്കുകൾ ശരിയായിരിക്കുന്നു. ഈ ഓണം വെടിക്കെട്ട് സിനിമയിലെ നായികയുടെ പുതിയ ഓണമാണ്. അതിന്റെ പൊൻതിളക്കവും പൊൻ വെട്ടവും ഐശ്വര്യയുടെ കുടുംബത്തിൽ നിറഞ്ഞുനിൽക്കുന്നുണ്ട്.

വിഷ്ണുവിന്റെ കാര്യത്തിലുമുണ്ട് ഈ പുതുമ. കഴിഞ്ഞ ഓണക്കാലം വരെ വിഷ്ണു നടനായിരുന്നു. തിരക്കഥാ കൃത്തായിരുന്നു. ഈ വർഷം സംവിധായകൻ കൂടിയാണെന്ന വിശേഷതയുമുണ്ട്.

ഐശ്വര്യ അനിൽ തുടർന്നു.

"പോയവർഷം എന്നെ ആർക്കും അറിയില്ലായിരുന്നു. ഇത്തവണ അഞ്ചു പേരിൽ മൂന്നുപേർക്കെങ്കിലും എന്നെ അറിയാമെന്നാണ് ഞാൻ കരുതുന്നത്.

ഐശ്വര്യയുടെ വാക്കുകൾ കേട്ടിരിക്കുകയായിരുന്നു റിങ്കു രണധീറും സിജാറോസും. അവരുടെ മുഖത്തും ആ വാക്കുകളുടെ പ്രതിഫലനം സന്തോഷമായി കാണുന്നുണ്ടായിരുന്നു.

സിജു റിങ്കുവിനോട് ചോദിച്ചു. ഈ വർഷത്തെ ഓണത്തിന് റിങ്കുവിന് എന്തെങ്കിലും വിശേഷതകളുണ്ടോ...?

ഉണ്ടെന്നു പറഞ്ഞ് റിങ്കു ചിരിക്കുന്നുണ്ടായിരുന്നു. എന്നിട്ട് സൂചിപ്പിച്ചു.

ഞാൻ ജനിച്ചതും വളർന്നതും പഠിച്ചതുമൊക്കെ രാജസ്ഥാനിൽ ആയിരുന്നു. എന്റെ പേരന്റ്സ് അവിടെ വർക്ക് ചെയ്യുകയായിരുന്നു പണ്ട്. ഞങ്ങളുടെ സ്വദേശം കൊടുങ്ങല്ലൂരാണ്. നാട്ടിലേക്ക് ഷിഫ്റ്റ് ചെയ്തു വന്നിട്ടിപ്പോൾ രണ്ടു വർഷമെ ആയിട്ടുള്ളൂ.

അതുകൊണ്ടുതന്നെ ഇവിടെ മലയാളികൾ ഓണം ആഘോഷിക്കുന്നതു പോലെയുള്ള അനുഭവങ്ങളൊന്നും എനിക്ക് പറയാനില്ല. എല്ലാ ഓണക്കാലവും രാജസ്ഥാനിലായിരുന്നു എന്നുതന്നെ പറയാം. ഉച്ചയ്ക്ക് ഓണസദ്യയുണ്ടാക്കും. അവിടുത്തെ ഞങ്ങളുടെ ഓണം അത് മാത്രമായി ചുരുങ്ങും.