ആരും നൂറ്ശതമാനം പൂർണ്ണരല്ല

മാളികപ്പുറം രചയിതാവ് അഭിലാഷ് പിള്ള മനസ്സുതുറക്കുന്നു

- മൈക്കിൾ വർഗ്ഗീസ് ചെങ്ങാടക്കരി

ബാല്യകൗമാരങ്ങളിൽ നട വഴികളിൽ തിമിർത്താടിയ നിന്നും വീണുകിട്ടിയ ഒരു മുത്ത്. അത് ഉരച്ചു മിനുക്കിയെടുത്തപ്പോൾ അത് കാലം കാത്തുവച്ച ചരിത്രവിജയം നേടിയ സിനിമയായി. മാളികപ്പുറം എന്ന വൻ ഹിറ്റുചിത്രത്തിന്റെ പിന്നാമ്പുറത്തേക്ക് കടന്നു ചെല്ലുമ്പോൾ നാം കാണുന്നത് അഭിലാഷ് പിള്ള എന്ന ചലചിത്ര കഥാകാരനേയും അദ്ദേഹം പിന്നിട്ട വഴികളുമാണ്. 2022 ൽ റിലീസ് ചെയ്ത ചിത്രങ്ങളിൽ വൻഹിറ്റ് എന്നു പറയാവുന്നത് വിരലിലെണ്ണാവുന്ന ചിത്രങ്ങൾ മാത്രം. അതിലൊന്നായി മാളികപ്പുറം എന്ന ചിത്രം. വൻ താരനിരയുടെ പിൻബലമോ ചിരപ്രതിഷ്ഠനായ ഒരു സംവിധായകന്റെ സാന്നിദ്ധ്യമോ ഇല്ലാത്ത ഈ ചിത്രം വമ്പൻ ഹിറ്റുകളിൽ ഒന്നായി മാറിയെങ്കിൽ അതിനു കാരണം ഒന്നേയുള്ളു. കെട്ടുറപ്പുള്ള അതിന്റെ തിരക്കഥയും വേറിട്ട അവതരണരീതിയും. തമിഴിലും മലയാ ളത്തിലുമായി മൂന്നു സിനിമകൾ ചെയ്തു വിജയിച്ച ചരിത്രമുണ്ട് മാളികപ്പുറത്തിന്റെ തിരക്കഥാകൃത്ത് അഭിലാഷ് പിള്ളയ്ക്ക്.

കുടുംബചിത്രം എന്നത് ക്ലീൻ ചിറ്റ് സിനിമകൾക്ക് നൽകുന്ന ഒരു വിശേഷണമാണ്. എന്നാൽ അഭി ലാഷ് പിള്ളയെ സംബന്ധിച്ചിട ത്തോളം അക്ഷരാർത്ഥത്തിൽ ഇതൊരു കുടുംബചിത്രം തന്നെയാണ്. കഥ, തിരക്കഥ, സംഭാഷണം അഭിലാഷ് പിള്ള. അതോടൊപ്പം ഭാര്യ അശ്വതി ഇതിൽ ശ്രദ്ധേയമായ വേഷത്തിൽ അഭിനയിച്ചു. മകൾ വൈഷ്ണവി പാടി. അതു കൊണ്ടാണ് പറഞ്ഞത് മാളികപ്പുറം അഭിലാഷ് പിള്ളയുടെ കുടുംബചിത്രം ആണെന്ന്. വിഷ്ണു ശശിശങ്കർ ആണ് ഈ ചിത്രത്തിന്റെ സംവിധായകൻ. ദിലീപ് നായകനായ കുഞ്ഞിക്കൂനൻ പോലുള്ള ഒരുപിടി ഹിറ്റ് ചിത്ര ങ്ങൾ മലയാള സിനിമയ്ക്ക് സമ്മാനിച്ച പ്രശസ്ത സംവിധായകൻ ശശിശങ്കറിന്റെ മകനാണ് വിഷ്ണു ശശിശങ്കർ.

നാൽപ്പത്തെട്ടു വർഷം മുമ്പാണ് ശബരിമല പ്രമേയമാക്കി വൻഹിറ്റ് ചിത്രം പുറത്തുവന്നത്. സ്വമി അയ്യപ്പൻ. ആ ചിത്രം എല്ലാ അർത്ഥത്തിലും ഭക്തിസാന്ദ്രമായ ഒരു ഐതിഹ്യ ചിത്രമായിരുന്നു. എന്നാൽ മാളികപ്പുറത്തിലേക്ക് വരുമ്പോൾ കാല ഘട്ടം മാറി എന്നുമാത്രമല്ല ഇതിവൃത്തത്തിലും അവതരണത്തിലുമെല്ലാം വലിയ മാറ്റങ്ങൾ ദൃശ്യമായി. ഒപ്പം അതിഭാവുകത്വമോ യുക്തിഭംഗമോ ഇല്ലാത്ത സംഭവങ്ങളും. പ്രേക്ഷകർ ഈ സിനിമയെ രണ്ടു കൈയും നീട്ടി സ്വീകരിച്ചതിൽ തെല്ലും അത്ഭുതമില്ല.