ഓണം; അതൊരു നൊസ്റ്റാൾജിയയാണ് ബി. സന്ധ്വ(റിട്ട. ഡി.ജി.പി)

ഇപ്പോഴും അത്തപ്പൂവിടും ഊഞ്ഞാലുകെട്ടും.. എല്ലാം പഴയതുപോലെ തന്നെ ചെയ്യും.. അച്ഛനും അമ്മയും കൂടെയുള്ളതിനാൽ ചില കാര്യങ്ങളിലെങ്കിലും ആ പഴമ നിലനിർത്താൻ കഴിയുന്നുണ്ട്. അതൊക്കെ വലിയ നൊസ്റ്റാൾജിയയാണ്.

- പി. ജയചന്ദ്രൻ

സംസ്ഥാന പോലീസ് വകുപ്പിൽ ഡി.ജി.പി തസ്തികയിൽ നിന്ന് വിരമിച്ച ബി. സന്ധ്യയ്ക്ക് ഡിപ്പാർട്ടുമെന്റിൽ ഒരു വിളിപ്പേരുണ്ട്; പെൺസിങ്കം. കേരള മനസ്സാക്ഷിയെ നടുക്കിയ ജിഷാവധം, കോളിളക്കം സൃഷ്ടിച്ച നടിയെ ആക്രമിച്ച കേസ്...തുടങ്ങി ഒട്ടനവധി കേസുകളിലെ അന്വേഷണമികവിന് ലഭിച്ച അംഗീകാരം തന്നെയാണ് ആ വിളിപ്പേര്.

സർവ്വീസിൽ നിന്ന് വിരമിച്ച ശേഷം ഇപ്പോൾ കേരളാ റിയൽ എസ്റ്റേറ്റ് റെഗുലേറ്ററി അതോറിറ്റി(RERA) മെമ്പറായി പ്രവർത്തിക്കുന്ന സന്ധ്യയ്ക്ക് ഓണത്തെപ്പറ്റി പറയുമ്പോൾ നൂറുനാവാണ്. ആ പഴയ പാവാടക്കാരിയുടെ മനസ്സ്.

ആലപ്പുഴയിലെ വാടകവീട്ടിലും, പാലായിലെ അച്ഛന്റെ തറവാട്ടിലും, ഈരാറ്റുപേട്ടയ്ക്കടുത്ത് തലപ്പലത്തെ അമ്മയുടെ തറവാട്ടിലും, കളത്തുകടവിലെ വല്യമ്മൂമ്മയുടെ(അപ്പൂപ്പന്റെ അമ്മ) തറവാട്ടിലുമൊക്കെയായി ആഘോഷിച്ച ഓണത്തെക്കുറിച്ചുള്ള ആ നല്ല ഓർമ്മകൾ നാൾസ്റ്റാൾജിയയായി സൂക്ഷിക്കുകയാണ് ഈ ഐ.പി.എസുകാരി. ആ ഓർമ്മകളിലൂടെ...

അച്ഛന് ജോലി ആലപ്പുഴയിലായിരുന്നതു കൊണ്ട് എന്റെ കുട്ടിക്കാലം മിക്കവാറും ആലപ്പുഴയിലായിരുന്നു. അവിടെ ഠൗണിൽ തന്നെയുള്ള ഒരു വാടകവീട്ടിലായിരുന്നു താമസം. അതുകൊണ്ടുതന്നെ ഓണത്തെപ്പറ്റിയുള്ള എന്റെ ഓർമ്മകളിൽ ഇന്നും മങ്ങാതെ തെളിഞ്ഞുനിൽക്കുന്നത് മുല്ലയ്ക്കൽ ക്ഷേത്രത്തിനടുത്തുള്ള ആ വാടക വീടും പരിസരവുമാണ്.

വിശാലമായ വലിയൊരു കോമ്പൗണ്ടിലായിരുന്നു ആലപ്പുഴയിൽ ഞങ്ങൾ താമസിച്ചിരുന്ന വീട്. മതിലുകളോ വേലിയോ ഒന്നുമില്ലാതെ കുറേ വീടുകളുണ്ടായിരുന്നു ആ കോമ്പൗണ്ടിൽ. കൊങ്ങിണി സമുദായത്തിൽപ്പെട്ട ഒരാളായിരുന്നു എല്ലാത്തിന്റെയും ഉടമസ്ഥൻ. കൂട്ടത്തിലൊരു വീട്ടിൽത്തന്നെയാണ് അദ്ദേഹവും കുടുംബവും താമസിച്ചിരുന്നത്.

അവർക്ക് ഓണത്തെക്കാൾ പ്രധാനം ആവണി അവിട്ടമാണ്. ഓണത്തിന് മുൻപായുള്ള ആവണി അവിട്ടത്തെ പിള്ളേരോണം, എന്നും വിളിക്കാറുണ്ട്. അങ്ങനൊരു പേരുള്ളതുകൊണ്ടാണോ എന്നറിയില്ല, ആ ദിവസം ഈ വീട്ടുമടസ്ഥൻ ഞങ്ങൾ പിള്ളേരെയൊക്കെ വിളിച്ച് പഴം കൊണ്ടുള്ള പായസം, ഇട്ടു എന്നുപറയുന്ന ഒരു പലഹാരം(പ്ലാവില കുമ്പിളുകുത്തി അതിൽ അരിമാവ് കുഴച്ച് നിറയ്ക്കുന്നത്) എന്നിവ തരും.