കണ്ണിന്റെ കാവലാളായി തങ്കച്ചൻ..

ഇന്ത്യയിൽ പ്രതിവർഷം ഒരു ലക്ഷം പേർക്ക് നേത്രപടലം മാറ്റിവയ്ക്കൽ ശസ്ത്രക്രിയ ആവശ്യമാണെന്നും ഇതിനായി രണ്ട് ലക്ഷം പേരെങ്കിലും നേത്രപടലങ്ങൾ ദാനം ചെയ്യേണ്ടതുണ്ടെന്നും ഇന്ത്യൻ ജേർണൽ ഓഫ് ഒഫ്താൽമോളജി വ്യക്തമാക്കുന്നു

- മൈക്കിൾ വർഗ്ഗീസ് ചെങ്ങാടക്കരി

കണ്ണിലെ കൃഷ്ണമണിപോലെ കാത്തു സൂക്ഷിക്കുക എന്നൊരു പ്രയോഗമുണ്ട്. കാഴ്ചയ്ക്ക് പകരം വെയ്ക്കാൻ ജീവിതത്തിൽ മറ്റൊന്നുമില്ല. കേരളത്തിൽ എല്ലാ വർഷവും ആയിരക്കണക്കിനുപേർ നേത്രപടലം മാറ്റിവെയ്ക്കാൻ കാത്തിരിക്കുന്നതായിട്ടാണ് കണക്ക്. വെളിച്ചത്തിന്റെ തുരുത്തിലേക്കുള്ള അവരുടെ ഏക പ്രതീക്ഷ, നേത്രദാന സമ്മതപത്രത്തിൽ ഒപ്പിട്ടു നൽകിയവരുടെയും അവരുടെ ബന്ധുക്കളുടെയും ഉദാരമനസ്കതയിൽ മാത്രമാണ്.

നേത്രദാനത്തിന് സമ്മതപത്രം നൽകിയ ആൾ മരിച്ചാൽ ആറു മണിക്കൂറിനകം നേത്രപടലം (കോർണിയ) നീക്കം ചെയ്ത് നേത്രബാങ്കിൽ സുരക്ഷിതമായി എത്തിക്കണം. സമ്മതപത്രത്തിൽ ഒപ്പിട്ടു നൽകിയ ആളുടെ ബന്ധുക്കൾ മരണവിവരം കൃത്യമായി ഐ ബാങ്കിൽ അറിയിക്കുന്നത് പ്രധാനമാണ്. ചിലപ്പോൾ സമ്മതപത്രം നൽകിയ ആൾ രാത്രിയായിരിക്കും മരിക്കുന്നത്. ഈ സമയം ഐ ബാങ്കിൽ നിന്ന് ഡോക്ടർക്ക് യഥാസമയം സ്ഥലത്ത് എത്തിച്ചേരാൻ സാധിച്ചെന്ന് വരില്ല. ഒന്നിലധികം സ്ഥലങ്ങളിൽ ഒരേസമയം ഡോണർ മരിച്ചാലും ഡോക്ടറുടെ ലഭ്യത കീറാമുട്ടിയാകും. ഈ സാഹചര്യത്തിലാണ് നേത്രപടലം സുരക്ഷിതമായി നീക്കം ചെയ്യുന്നതിന് ആരോഗ്യ പ്രവർത്തകർക്ക് പരിശീലനം നൽകാനുള്ള പദ്ധതിയുമായി ഐ ബാങ്ക് അസ്സോസിയേഷൻ ഓഫ് ഇന്ത്യ സർക്കാരിനെയും ഇന്ത്യൻ മെഡിക്കൽ കൗൺസിലിനെയും സമീപിക്കുന്നത്.

അങ്ങനെയാണ് ഐ റിക്കവറി ടെക്നീഷ്യൻ സെർട്ടിഫിക്കേഷൻ കോഴ്സിന് അംഗീകാരം കിട്ടുന്നത്. വൃക്കയും കരളും ഉൾപ്പെടെ മനുഷ്യ ശരീരത്തിലെ മറ്റേത് അവയവവും ഡോണറിൽ നിന്ന് പുറത്തെടുക്കുന്നതിന് ഡോക്ടറുടെ സേവനം ഒഴിച്ചുകൂടാത്തതാണ്. എന്നാൽ ദാതാവിന്റെ ശരീരത്ത് നിന്ന് നേത്രപടലം പുറത്തെടുക്കാൻ ഡോക്ടർ തന്നെ വേണമെന്നില്ല. പരിശീലനം ലഭിച്ച ഐ റിക്കവറി ടെക്നീഷ്യനും നേഴ്സുമാരും മതിയാകും.

തങ്കച്ചന്റെ റിക്കാർഡ്