അതിർവരമ്പുകൾ കാത്തുസൂക്ഷിക്കാം

 ഓരോ വ്യക്തിക്കും അതിർവരമ്പുകളുണ്ട്. അതെന്തെന്നറിയാം, മറികടക്കാതിരിക്കാം.

- സ്വാതി ജഗ്ദീഷ് സെക്ഷ്വാലിറ്റി എജ്യൂക്കേറ്റർ

ഇകഴിഞ്ഞ ഡിസംബറിൽ നല്ല മഞ്ഞുള്ളൊരു ദിവസം. എട്ടു വയസ്സുള്ള മകളോടു പുറത്തു നല്ല മഞ്ഞാണു സ്വറ്ററിട്ട് പോകൂ എന്നു ഞാൻ പറഞ്ഞു. അവൾ തിരിഞ്ഞ് എന്നെ നോക്കി "അമ്മയ്ക്ക് തണുക്കുന്നെങ്കിൽ അമ്മ സ്വറ്ററിട്ടോളൂ. എനിക്ക് തണുക്കുന്നില്ല' എന്നു മറുപടി പറഞ്ഞു.

ഇതു പണ്ട് എന്റെ വീട്ടിലായിരുന്നെങ്കിൽ എന്റെ അമ്മ കരുതുക ഞാൻ ധിക്കാരം കാട്ടി എന്നാകും. "തർക്കുത്തരം പറയുന്നോ? പറയുന്നത് അങ്ങോട്ട് അനുസരിച്ചാ മതി' എന്നാകും പ്രതികരണം. എന്നാൽ എന്റെ മകളുടെ കാര്യം വരുമ്പോൾ അവൾ സ്വന്തം ശരീരം നൽകുന്ന അടയാളങ്ങളെ എന്നേക്കാൾ നന്നായി മനസ്സിലാക്കി അതിന്റെ ആവശ്യങ്ങൾ അറിഞ്ഞ് അവളുടെ ശാരീരിക അതിർവരമ്പുകൾ കാത്തുസൂക്ഷിക്കുന്നു എന്നാണു ഞാൻ കരുതുക. അതു ഞാൻ ബഹുമാനിക്കും. അവളുടെ മറുപടിയേയും.