My life Partner

സസ്പെൻസും ട്വിസ്റ്റുമുള്ള പ്രണയകഥയും വിവാഹ വിശേഷങ്ങളുമായി മലയാളത്തിന്റെ പ്രിയനടൻ സുദേവ് നായരും വധു അമർദീപ് കൗറും

- രൂപാ ദയാബ്ജി

മുംബൈ അഞ്ചേരിയിലെ ഒരു ഫ്ലാറ്റ്. അകത്തു മേക്കപ്പും പുറത്തു ലൈറ്റപ്പും തകൃതിയായി നടക്കുന്നു. മലയാളത്തിലും ഹിന്ദിയിലും ഇംഗ്ലിഷിലും ഗുജറാത്തിയിലുമൊക്കെയുള്ള സംഭാഷണങ്ങൾ ഉയർന്നു കേൾക്കുന്നതു കൊണ്ട് ഇതൊരു "മൾട്ടി ലാംഗ്വേജ്' സിനിമാ സെറ്റാണെന്നു കരുതല്ലേ.

സിനിമയെ “മാത്രം' പ്രണയിച്ച നടൻ സുദേവ് നായരുടെ ഫ്ലാറ്റാണിത്. ഇപ്പോൾ സുദേവിന്റെ ജീവിതത്തിൽ പ്രണയം നിറയ്ക്കുന്നതു പഞ്ചാബി സുന്ദരിയായ അമർദീപ് കൗർ ആണ്. ഇക്കഴിഞ്ഞ ഫെബ്രുവരി 19നു ഗുരുവായൂരിൽ വച്ചായിരുന്നു വിവാഹം. വനിത വെഡിങ് സ്പെഷൽ ഫോട്ടോഷൂട്ടിനു ശേഷം സുദേവ് സംസാരിക്കാനിരുന്നപ്പോൾ കൈപിടിച്ച് അമർദീപും ഉണ്ടായിരുന്നു.

മുംബൈയിൽ ജനിച്ചുവളർന്ന സുദേവും ഗുജറാത്തുകാരി അമർദീപും എങ്ങനെ ഗുരുവായുരമ്പല നടയിൽ വച്ചു വിവാഹിതരായി ? പ്രണയത്തിലാണെന്നു പരസ്പരം തുറന്നു പറഞ്ഞ കാലത്തു തന്നെ അമർദീപ് ഈ മോഹം പറഞ്ഞിരുന്നു, അമ്പലത്തിൽ വച്ചു കല്യാണം കഴിക്കണം. കേരളീയ വിവാഹത്തിന്റേതായ എല്ലാം ട്രഡീഷനൽ ചടങ്ങുകളും വേണം.

പഞ്ചാബിയാണെങ്കിലും ഗുജറാത്തിൽ ജനിച്ചു. മുംബൈയിൽ വളർന്ന അമർദീപിനു മലയാളിയായ എന്നെ വിവാഹം കഴിക്കുമ്പോൾ നാടിന്റെ തനിമയുള്ള ചടങ്ങുകൾ വേണമെന്ന ആഗ്രഹം സ്വാഭാവികം.

പക്ഷേ, മുംബൈയിൽ ജനിച്ചുവളർന്ന എനിക്കു ഗുരുവായൂരമ്പലത്തിലെ കല്യാണം കുറച്ച് അമ്പരപ്പുണ്ടാക്കി. അനിയൻ സുജയുടെ വിവാഹം 2019ൽ നടന്നതാണെങ്കിലും അതു മുംബൈയിൽ വച്ചായിരുന്നു. നാട്ടിലെ കല്യാണ വസ്ത്രം മുതൽ ചടങ്ങുകളെ കുറിച്ചു വരെ മുതിർന്നവരോടു ചോദിച്ചു മനസ്സിലാക്കേണ്ടി വന്നു ഞങ്ങൾ.

നിങ്ങളുടെ പ്രണയകഥ പറയൂ...

അമർദീപിനു 13 വയസ്സുള്ളപ്പോൾ അച്ഛനെ നഷ്ടപ്പെട്ടതാണ്. അമർദീപിനെയും ചേച്ചിയെയും അനിയനെയും ഒരു കുറവും അറിയിക്കാതെയാണ് അമ്മ വളർത്തിയത്. മോഡലിങ്ങിലാണ് അവൾ കരിയർ കണ്ടത്. 2017ലെ ഫെമിന മിസ് ഇന്ത്യ ജേതാവായിരുന്നു. അതേ വർഷം തന്നെ മിസ് ഇന്ത്യ മത്സരത്തിന്റെ അവസാന റൗണ്ടിലുമെത്തി.