கொங்காடி த்ரிஷா....

சமீபத்தில் ஐசிசி அண்டர் 19 மகளிர் டி20 இரண்டாவது உலகக் கோப்பை போட்டிகள் மலேசியாவில் நடந்து முடிந்தன.

- பேராச்சி கண்ணன்

இதில் தென்னாப்பிரிக்காவிற்கு எதிரான இறுதிப்போட்டியில் 9 விக்கெட் வித்தியாசத்தில் அபார வெற்றி பெற்று இரண்டாவது முறையாக டி20 உலகக் கோப்பை சாம்பியன் ஆனது இந்திய அணி.

ஏற்கனவே 2023ம் ஆண்டு தென்னாப்பிரிக்காவில் நடந்த முதல் அண்டர் 19 மகளிர் டி20 உலகக் கோப்பையின் இறுதிப்போட்டியிலும் ஷஃபாலி வர்மா தலைமையிலான இந்திய அணி, இங்கிலாந்து அணியை வீழ்த்தி வரலாற்று சாதனை படைத்திருந்தது.

இப்போது தொடர்ந்து இரண்டாவது உலகக் கோப்பையையும் தன்வசப்படுத்தியுள்ளது. இந்த வெற்றிக்கு வித்திட்டவர் இந்திய அண்டர் 19 அணியின் ஆல்ரவுண்டரான கொங்காடி த்ரிஷாதான்.

அவர் இந்த உலகக் கோப்பையின் இறுதிப்போட்டியில் 33 பந்துகளில் 44 ரன்கள் ஆட்டமிழக்காமல் எடுத்து சிறந்த வீராங்கனை விருதினை தட்டிச் சென்றதுடன், தொடரின் நாயகி விருதினையும் வென்று ரசிகர்களின் மனதில் நீங்கா இடம் பிடித்துவிட்டார்.

இந்த டி20 உலகக் கோப்பையில் மட்டும் அவர் மொத்தமாக ஒரு சதம் உட்பட 309 ரன்கள் குவித்தார். அதுமட்டுமில்லாமல் ஏழு விக்கெட்டுகளையும் கைப்பற்றி இந்திய அணியின் வெற்றிக்கு அரணாக விளங்கினார்.