கள்ளத்தனமாக அமெரிக்கா சென்ற இந்தியர்களில் குஜராத்திகளே அதிகம்!

சட்டவிரோதமாகக் குடியேறிவர்கள் என அண்மையில் அமெரிக்கா 104 இந்தியர்களை அவமானப்படுத்தி இந்தியாவுக்குத் திருப்பி அனுப்பியதை பலர் அறிந்திருக்கலாம். இதில் என்ன விசேஷம் என்றால் இந்த 104 பேரில் 33 பேர் குஜராத் மாநிலத்தைச் சேர்ந்தவர்கள் என்பதுதான்.

-  டி.ரஞ்சித்

குஜராத் மாடல் என தூக்கத்தில்கூட உச்சரிக்கும் பாஜக, இதற்கு எந்த விளக்கமும் அளிக்கத் தயாரில்லை.

ஆனால், இந்த குஜராத் மாடலுக்கும், குஜராத்திகள் சட்டவிரோதமாக வெளிநாடுகளுக்கு போகும் போக்கையும் இணைத்து பல அரசியல் மற்றும் பொருளாதார நிபுணர்கள் விளக்கமளித்திருப்பது குஜராத் மாடலின் உண்மையான முகத்தை அறியக்கூடியதாக இருக்கிறது.

பொதுவாக எல்லா மாநிலங்களைப் போல குஜராத்தில் இருந்தும் வேலைக்காக வெளிநாடு செல்வது என்பது வழக்கமாக இருந்திருக்கிறது; இருக்கிறது. மலையாளிகள் வளைகுடா நாடுகளுக்கு வேலைக்காக படையெடுத்தது - படையெடுப்பது - போல், குஜராத்திகள் ஆப்பிரிக்கா மற்றும் மேற்குலக நாடுகளுக்கு வேலை தேடிச் சென்றது அல்லது செல்வது வழக்கம்தான்.

ஆனால், இந்தப் புலப்பெயர்வு எல்லாமே சட்டத்துக்கு உட்பட்டவை என்று சொல்லும் நிபுணர்கள், இன்னொரு விஷயத்தை அழுத்தம் திருத்தமாகச் சொல்கிறார்கள்.

அதாவது இன்று குஜராத்திலிருந்து மேற்குலக நாடுகளுக்குச் செல்லும் நபர்கள் சட்டப்படி செல்வதற்குக்கூட கையில் பணமில்லா படு ஏழைகளாக இருக்கிறார்கள். இதனால்தான் அமெரிக்கா போன்ற நாடுகளுக்கு சட்டவிரோதமாகக் குடியேறுகிறார்கள் என்கிறார்கள். ஆம். குஜராத் மாடலில்தான் பரம ஏழைகளாக பெரும்பான்மையான மக்கள் வசிக்கிறார்களாம். புள்ளிவிபரங்கள் அப்படித்தான் முகத்தில் அறைகின்றன.