Unlock Happiness

നെഗറ്റിവിറ്റിയെ അംഗീകരിച്ചു കൊണ്ടു മാത്രമേ സമ്മർദ കൊടുങ്കാറ്റിൽ കടപുഴകാത്ത സന്തോഷം നമുക്കു സ്വന്തമാക്കാൻ കഴിയൂ. അതിനു സഹായിക്കുന്ന 50 തന്ത്രങ്ങൾ പറയാം

- ഡോ. തോമസ് ജോർജ്.കെ മാനേജ്മെന്റ് വിദഗ്ധൻ, ഇന്റർനാഷനൽ ട്രെയിനർ ഡയറക്ടർ ലീഡ് കോളജ് ഓഫ് മാനേജ്മെന്റ്, പാലക്കാട്

മോ ട്ടിവേഷൻ കൊണ്ടെനിക്കിരിക്കാൻ വയ്യേ എന്നു തോന്നും ചിലപ്പോൾ ഇൻസ്റ്റഗ്രാം തുറന്നാൽ രസകരമായ പശ്ചാത്തലസംഗീതവും ചിന്തകളിൽ വെൺനിലാവ് നിറയ്ക്കുന്ന വാചകങ്ങളും. പക്ഷേ, തിയറി മാത്രം ശരിയായാൽ പോരല്ലോ. അതു പ്രാവർത്തികമാക്കുന്നതിലും നേടേണ്ടേ ഫുൾ മാർക്ക്. അവിടെയാണു പലർക്കും പണി പാളുന്നത്. ഇൻസ്റ്റഗ്രാമിലെ പോസിറ്റിവിറ്റി വിഡിയോ കണ്ട് ഒരാൾ തീരുമാനിക്കുന്നു. ഇനി ശാന്തമായ പുഞ്ചിരിയോടെ മാത്രമേ ഓഫിസിലെ പ്രശ്നങ്ങളേ നേരിടൂ. അല്ലെങ്കിൽ വീട്ടിൽ നിന്നു കേൾക്കാനിടയുള്ള കുറ്റപ്പെടുത്തലുകളെ ക്ഷമയോടെ കേൾക്കും.

ഈ ക്ഷമയും പുഞ്ചിരിയുമൊക്കെ ആദ്യ പത്തുമിനിറ്റ് നേരമേ പൊതുവേ നിലനിൽക്കൂ. ചില ധീരർ 20 മിനിറ്റ് വരെ പിടിച്ചു നിന്നെന്നിരിക്കും. അതോടെ സമ്മർദത്തിന്റെ വാതകം നിറച്ച ബലൂൺ ഠപ്പേന്ന് പൊട്ടും. പോസിറ്റിവിറ്റി തവിടുപൊടി. പിന്നെ, ആൾ ഈസ് വെൽ എന്നു നൂറു തവണ പറഞ്ഞിട്ടും കാര്യമില്ല. നെഗറ്റിവിറ്റിയുടെ കടിയനുറുമ്പുകൾ ആസിഡ് നിറച്ച വാക്കുകളുമായി കളം നിറഞ്ഞാടും. ഒറ്റ വാചകത്തിൽ പറഞ്ഞാൽ സീൻ കയ്യീന്ന് പോകും. നെഗറ്റിവിറ്റിയെ അംഗീകരിച്ചു കൊണ്ടു മാത്രമേ സമ്മർദ കൊടുങ്കാറ്റിൽ കടപുഴകാത്ത സന്തോഷം നമുക്കു സ്വന്തമാക്കാൻ കഴിയൂ. അതിനു സഹായിക്കുന്ന 50 തന്ത്രങ്ങൾ പറയാം.

കലിക്കരുത്, കലിപ്പിക്കരുത്

നിങ്ങൾ ഓഫിസിലേക്കു പോകുമ്പോൾ പല ട്രാഫിക് നിയമ ലംഘനങ്ങളും കാണും. ട്രാഫിക് നിയമങ്ങൾ കൃത്യമായി പാലിക്കുന്നവർക്ക് ഇതു കാണുമ്പോൾ ഇരട്ടി ദേഷ്യം വരും. അതു പാലിക്കാത്തവർ ക്കു പോലും മറ്റുള്ളവരുടെ തോന്ന്യാസം കാണുമ്പോൾ കലിപ്പിരയ്ക്കും. പിന്നെ, പല്ലിറുമ്മലായി, മനസ്സിലെങ്കിലും ചീത്തവിളിയായി. ഫലമോ നിങ്ങളുടെ മനസ്സ് നെഗറ്റിവിറ്റിയുടെ ഭൂകമ്പ പ്രദേശമാകും.

കുടുംബവുമൊത്തു യാത്ര പോകുമ്പോഴാണ് ഇത്തരം സംഭവം ഉണ്ടാകുന്നതെങ്കിൽ നല്ല മൂഡ് പോകാൻ ഇതു മതി. ഇക്കാര്യം സഹയാത്രികരും ശ്രദ്ധിക്കണം. ഡ്രൈവ് ചെയ്യുന്ന ആൾ എങ്ങനെയെങ്കിലും ദേഷ്യം നിയന്ത്രിക്കുമ്പോഴാകും "എന്തൊരു വൃത്തികേടാണ് അയാൾ ചെയ്തത്' എന്ന മട്ടിൽ സഹയാത്രികരുടെ കമന്റ് വരുന്നത്. അത്തരം സന്ദർഭങ്ങളിൽ ദയവായി നിശബ്ദത പാലിക്കുക.

1. ശത്രു അകത്തു തന്നെ