కరోనా గడ్డు పరిస్థితిని సృష్టించింది -దివ్యా ద్వివేది

కరోనా మహమ్మారి కారణంగా భోజ్ పురి సినిమా పరిశ్రమలో షూటింగ్లు ఆగిపోయాయి. చాలామంది నటులు తమను తాము రక్షించు కోవడానికి ఇళ్లలోనే ఖైదీలు అయ్యారు. కానీ భోజ్ పురి బెల్ట్ ప్రేక్షకులు నిరాశ చెందకూడదని కొంతమంది కళాకారులు ఆన్లైన్లోనే తమ అభిమానులను చేరుతూ, వారి గురించి బాగా తెలుసుకోవడానికి ప్రయత్నాలు చేస్తున్నారు. భోజ్ పురి హీరోయిన్లలో చాలామందిపై లాక్ డౌన్ దుష్ప్రభావం పడింది. ఇలాంటి స్థితిలో భోజ్ పురిలో డజన్ల కొద్ది సినిమాలు చేసిన వర్ధమాన నటి దివ్య ద్వివేది తన సినీ ప్రయాణం గురించి, కరోనా భోజ్ పురి పరిశ్రమ పై చూపించిన ప్రభావం గురించి సుదీర్ఘంగా చర్చించింది. అందులోని ముఖ్యాంశాలు ఇక్కడ ఇస్తున్నాం.

భోజ్ పురి సినిమాలో హీరోయిన్‌గా ప్రవేశించడం యాదృచ్చికంగా జరిగిందా లేక మీరు ముందుగానే సిద్ధమై వచ్చారా?

భోజ్ పురి సినిమాల్లోకి రావాలనే ఉద్దేశంతోనే వచ్చాను. ఎందుకంటే నాకు డ్యాన్స్ పైన ఆసక్తి ఎక్కువ. ఒక ఫేమస్ డ్యాన్సర్ కావాలని అను కున్నాను. కానీ నాకు చిన్నప్పుడే ఒక పంజాబీ సినిమాలో బాల కళాకారిణిగా నటించే అవకాశం లభించింది.