Its all about fun

വാഹന വിശേഷങ്ങളുമായി ടെലിവിഷൻ താരം എലീന പടിക്കൽ

- ദേവു ദാസ്

വാതോരാതെയുള്ള നോൺ സ്റ്റോപ് സംസാരം പോലെ തന്നെയാണ് എലീന പടിക്കലിന്റെ കയ്യിലൊരു വാഹനം കിട്ടിയാലും. 'ഇറ്റ്സ് ഓൾ എബൗട്ട് ഫൺ' എന്നും പറഞ്ഞ് വണ്ടിയും കൊണ്ട് ഒരൊറ്റപ്പാച്ചിലാണ്. സംസാരത്തിലെന്നപോലെ ഡ്രൈവിങ്ങിലും വേഗം തന്നെ എലീനയ്ക്കു പ്രിയം. മികച്ച ആങ്കറിങ്ങിലൂടെ പ്രേക്ഷകരെ പിടിച്ചിരുത്തുന്ന എലീനയ്ക്ക് വാഹനങ്ങളോടുള്ള പ്രണയം ചെറുതല്ല. ആങ്കറിങ് കഴിഞ്ഞാൽ എലീനയുടെ ഇഷ്ട വിനോദവും യാത്രകളും ഡ്രൈവിങ്ങുമാണ്. ചുറ്റിയടി മുഴുവൻ സ്വയം ഡ്രൈവു ചെയ്തുതന്നെ.

ഇഷ്ടപ്പെട്ട കാറുകളെയും ബൈക്കുകളെയും കുറിച്ചു പറയുമ്പോൾ കുസൃതി നിറഞ്ഞ ചിരിയിൽ വാചാലയാവും എലീന. എല്ലാവരെയുംപോലെ ആദ്യം സൈക്കിളോടിക്കാനാണ് എലീന പഠിച്ചത്. പിന്നാലെ സ്കൂട്ടറിലേക്കാവും തിരിഞ്ഞത് അല്ലേ എന്നു ചോദിച്ചാൽ എലീന പറയും "ഏയ് അല്ല, ബൈക്ക് ഓടിക്കാനായിരുന്നു എനിക്കിഷ്ടം'. വാഹനങ്ങളോടുള്ള സ്നേഹം പോലെ തന്നെ അവയോടൊപ്പം ചീറിപ്പായുന്ന ഓർമക്കഥകളും ഏറെപ്പറയാനുണ്ട് എലീനയ്ക്ക്....

കൈ തെളിഞ്ഞത് പ്രീമിയർ പദ്മിനിയിലും അംബാസഡറിലും

ഒറ്റമകളായതുകൊണ്ട് അമ്മയ്ക്കും അപ്പനും നിർബന്ധമായിരുന്നു സ്വന്തമായി കാറും ബൈക്കും ഓടിക്കാൻ അറിഞ്ഞിരിക്കണമെന്നത്. നാലാം ക്ലാസിൽ പഠിക്കുമ്പോൾ സൈക്കിൾ ഓടിക്കാൻ പഠിച്ചു. പിന്നീട് പതിയെ ബൈക്കിലേക്കും കടന്നു. അമ്മ നന്നായി ബൈക്ക് ഓടിക്കും. അമ്മയായിരുന്നു എന്റെ ഗുരു. ഞായറാഴ്ച ദിവസങ്ങളിൽ കുടുംബസമേതം വെട്ടുകാട് പള്ളിയിൽ പോകും. കുർബാനയ്ക്കുശേഷം ഇന്ത്യൻ കോഫി ഹൗസിൽ നിന്ന് മസാലദോശയും അകത്താക്കി നേരേ ശംഖുമുഖത്തിനടുത്തുള്ള പാർക്കിൽ എത്തും. സ്വസ്ഥമായി ബൈക്ക് ഓടിച്ചു പഠിക്കാൻ പറ്റിയയിടമാണിത്. നല്ല ഉയരം ഉള്ളതു കൊണ്ട് എളുപ്പത്തിൽ ബൈക്ക് പഠിച്ചെടുക്കാൻ സാധിച്ചു. പിന്നീട് ബൈക്ക് റൈഡിനോടായി കമ്പം. ടിവിഎസ് വിക്ടറാണ് ആദ്യമായി ഓടിക്കുന്നത്.