ఊచకోత

ఊచకోత

'ఈ రోజుకి కొత్త పదం “M-A-S-S-A-C-R-E." కాంచన మేడమ్ బ్లాక్ బోర్డ్్ప ఒక్కో అక్షరం వరుసగా రాసి చెప్పింది.

“MASS-ACRE అంటే ఎన్నో ఎకరాల భూమి" తల గోక్కుంటూ చెప్పాడు ఉదయ్.

“MASCARA కి ఇది ప్లూరల్ కదా” నవ్వుతూ చెప్పింది నవ్య. ఆమెకు ఫ్యాషన్ పిచ్చి. తన సమాధానం తప్పయి ఉంటుందని తెలిసి మళ్లీ నవ్వింది. ఇంకే అర్థాలు స్ఫురించకపోవడంతో క్లాసంతా సద్దుమణిగింది. సరైన అర్థం కోసం అందరు కాంచన మేడమ్ వైపు చూసారు. ఒక కొత్త పదం పరిచయం చేయడం, దాని అర్థం తెలుసుకోవడం ప్రతిరోజు జరిగే కార్యక్రమం ఇది.

కాంచన మేడమ్ తన విద్యార్థులు బయటి ప్రపంచం గురించి ఆలోచించాలని, తెలుసుకోవాలని కోరుకునేది. పరిసరాలు, వాటి చరిత్ర గురించి పిల్లలకు నేర్పించాలని, కేవలం పాఠ్య పుస్తకాలు చదివి నేర్చుకోవడం మంచిది కాదని ఆమె భావించేది.

“MASSACRE” కి అర్థం పెద్ద సంఖ్యలో చంపడం” అని పిల్లలవైపు చూస్తూ చెప్పింది.

“నిరాయుధులైన, తిరిగి పోరాడలేని వ్యక్తులను చంపడం దీని అర్థం" ఒక్కసారిగా క్లాసులో నిశ్శబ్దం ఆవరించింది. పిల్లలకు ఈ పదం రొటీన్ వర్డ్ కాదు. ఆ పసి మనసులకు అర్థం కాదు కూడా.

“అయితే, ఎవరైనా అలా ఎందుకు చంపుతారు? ఇది అమానవీయం, అనైతికం" ఈ పదాన్ని అర్థం చేసుకున్న మొదటి విద్యార్థి సహదేవ్ ప్రశ్నించాడు.

“నిజమే సహదేవ్. కానీ నిజ జీవితంలో ఇలాంటి సంఘటనలు జరుగుతుంటాయి”.

“మా ఇంట్లో చీమలు పుట్ట పెడితే నేను బకెట్ నీళ్లు కుమ్మరిస్తాను. ఇది నరమేధం అవుతుందా? వికసించిన పూలను తెంపితే అది ఊచకోత అవుతుందా?" పదాన్ని బాగా అర్థం చేసుకునే క్రమంలో అడిగింది కీర్తి.

కాంచన మేడమ్ కొద్దిసేపు ఆలోచించింది.

“సాంకేతికంగా చూస్తే నిజమే. నువ్వు దాన్ని అలా పిలవచ్చు. కానీ సాధారణంగా జంతువులు, కీటకాలు, పూలకు మనం 'Butcher' లేదా 'Slaughter' అనే పదం ఉపయోగిస్తుంటాం.'Massacre' పదాన్ని ఎక్కువగా మనుషులకు వాడుతారు”.

"మేడమ్, అలాంటి సంఘటన జరిగి ఏదైనా ఉంటే చెబుతారా? మనుషులు అలా చేస్తారని నేను అనుకోను" అడిగింది ప్రియ.