ചാരുകസേരയും പടിഞ്ഞാറെച്ചിറയും

പ്രപഞ്ചം ഇരുണ്ടാൽനക്ഷത്രവെട്ടത്തിന്റെ നേർമ പുതച്ച് ചിറ ഉറങ്ങും. തൊലിയിൽ ഓളമനക്കി,ആനയുറങ്ങുന്നതുപോലെ നിങ്ങൾ കരുതു അത്ര ബോധം കെട്ടുറങ്ങുകയല്ല ഞാനെന്നാണു ചർമതരംഗത്തിലെ ആനയുടെ സന്ദേശം: ചിറയുടെയും.

- കെജിഎസ്

അൻപതു കൊല്ലം മുൻപ് തൃശൂരിൽ കുറെക്കാലം ഞാൻ താമസിച്ചിരുന്നത് പടിഞ്ഞാറെച്ചിറയുടെ വക്കത്തെ ഒരു പഴയ വീടിന്റെ മേലേ നിലയിൽ. (മൈത്രി ഒന്നിലെ വീട്). ജനാലയ്ക്കലെ ചാരുകസേരയിലിരുന്നാൽ നേരെ കാണുന്നത് ചിറത്തുറസ്സ്. നീലപ്പച്ച ജലമൗനം. ജലമയൂരം പീലി വിടർത്തിയ പ്രതീതി.

ഒരിക്കൽ അപ്രതീക്ഷിതമായി എം. ഗംഗാധരന്റെ കൂടെ വന്ന തായാട്ട് ശങ്കരൻ ചോദിച്ചു: സ്ഥിരമായിങ്ങനെ വെള്ളം പഠിച്ച് ചാരുകസേരയിലിരുന്നാൽ വെള്ളത്തിന്റെ പ്രമാണപ്രകാരം ആരും ഇരിക്കുന്ന പാത്രത്തിന്റെ വടിവിലാകില്ലേ?

 സാധ്യതയുണ്ട്. പക്ഷേ, ഒരിക്കലും ചാരുകസേരയിലിരുന്നിട്ടില്ലാത്ത വയസർപോലും ചാരുകസേരവടിവിൽ കൂനിനിന്നു ഭിക്ഷ യാചിക്കുന്നതും കഴലും കുത്തി നടക്കുന്നതും ജരവിരിപ്പിൽ വളഞ്ഞ് കിടക്കുന്നതും ഞാൻ കണ്ടിട്ടുണ്ട്.

നമ്മൾ മാത്രമല്ല നമ്മുടെ ഫർണിച്ചറുകളും മൃഗങ്ങളിൽ നിന്നാണു പരിണമിച്ചുണ്ടായത്. കുത്തിയിരിക്കാൻ കഴിയുന്ന പൂശകൻ, ശുനകൻ, കുരങ്ങ്, കുറുക്കൻ, ചെന്നായ, പുലി, കടുവ, സിംഹം തുടങ്ങിയവയുടെ ഛായയിൽ പല കസേരകൾ ഞാൻ കണ്ടിട്ടുണ്ട്. ആന, കുതിര വടിവിൽ മറ്റുപകരണങ്ങളും. പുശകാസനം, കടുവാസനം, വ്യാഘാസനം എന്നൊന്നും പ്രസിദ്ധിയില്ലെന്നേയുള്ളൂ. സിംഹാസനത്തിൽ സൃഗാലനോ ശുനകനോ മൂഷികനോ കുതിരബെഞ്ചിൽ പൂശകനോ കരടിയോ അണ്ണാനോ കേറിയിരുന്നെന്നുവരാം. മേശ പശുവിൽനിന്നും പത്തായം കാണ്ടാമൃഗത്തിൽ നിന്നും വന്നതാണെന്നു ഫർണിച്ചറുകളുടെ ഡാർവിൻ സങ്കരപ്പിറവികളും സുലഭം. പാടത്ത് പശുവിന്റെ പുറത്ത് കാക്കയും കൊക്കും ഇരിക്കുന്ന ഓർമയിൽ ചില സോഫകളുടെ ചാരിലും തോളത്തും തത്ത, ഗരുഡൻ, പരുന്ത് തുടങ്ങിയവ ഇരിക്കാറുണ്ട്. പഴയ മണിയറ മഞ്ചലിൽ ഇണക്കുരുവികൾ ഇണക്കം പാടിയിരിക്കുന്നത് പതിവായിരുന്നു. കൂന് അന്തർമുഖമായ ഒട്ടകമായിരിക്കണം ചാരുകസേരയുടെ പൂർവികൻ. മുള്ള് ചവച്ചും വെള്ളം സ്വപ്നം കണ്ടും കാനൽജലത്തെ പിൻതുടർന്നും മരുഭൂമി താണ്ടുന്നതാണ് ഇതിലെ ഇരിപ്പുകളേറെയും.