തോറ്റു തൊപ്പിയിട്ട് CPO നിയമനം!

ഒരു വർഷ ലിസ്റ്റ് രണ്ടര മാസം പിന്നിട്ടു ഇതുവരെ ഒറ്റ നിയമനമില്ല

- ഷാജി പൊന്നോല

സിവിൽ പൊലീസ് ഓഫിസർ റാങ്ക് ലിസ്റ്റുകൾ നിലവിൽ വന്ന് രണ്ടര മാസം കഴിഞ്ഞിട്ടും ഇതുവരെ ഒരാൾക്കുപോലും നിയമനമായില്ല. ഏഴു ബറ്റാലിയനിലായി ഈ വർഷം ഏപ്രിൽ 15നു നിലവിൽ വന്ന സിപിഒ റാങ്ക് ലിസ്റ്റിന്റെ മെയിൻ ലിസ്റ്റിൽ 4,725 പേരും സപ്ലിമെന്ററി ലിസ്റ്റിൽ 1,922 പേരുമടക്കം 6,647 പേരെയാണ് ഉൾപ്പെടുത്തിയത്. ഒന്നാം റാങ്ക് ലഭിച്ചയാൾക്കു പോലും നിയമന ശുപാർശ ലഭിച്ചിട്ടില്ല. ഒരു വർഷം മാത്രമാണു ലിസ്റ്റിന്റെ കാലാവധി. ഇതിൽ രണ്ടര മാസം കഴിഞ്ഞു. മുൻ റാങ്ക് ലിസ്റ്റിൽ നിന്ന് 4,783 പേർക്കു നിയമന ശുപാർശ നൽകിയിരുന്നു.

റിപ്പോർട്ട് ചെയ്തത് 6NJD ഒഴിവു മാത്രം

സിവിൽ പൊലീസ് ഓഫിസർ തസ്തികയുടെ 6 എൻജെഡി ഒഴിവു മാത്രമാണ് ഇതുവരെ റിപ്പോർട്ട് ചെയ്തത്. തൃശൂർ (കെഎപി-2) ജില്ല യിൽ കഴിഞ്ഞ മേയ് 25ന് 5 ഒഴിവും ജൂൺ 1ന് ഒരൊഴിവും റിപ്പോർട്ട് ചെയ്തിട്ടുണ്ട്. ബാക്കി 6 ബറ്റാലിയനിലെ ഒറ്റ ഒഴിവുപോലും വന്നിട്ടില്ല. മുൻ ലിസ്റ്റിലെ അവസാന നിയമന ശുപാർശ യുടെ അടിസ്ഥാനത്തിലുള്ള എൻജെഡി ഒഴിവ് എല്ലാ ബറ്റാലിയനുകളിലും ഉണ്ടെന്നാണു വിവരം. എന്നാൽ, ഇതൊന്നും പിഎസ്സിയിൽ റിപ്പോർട്ട് ചെയ്യാൻ പൊലീസ് വകുപ്പ് തയാറാകുന്നില്ല.