അസാധ്യ സാധ്യതകളുടെ റോബട്ടിക്സ് & ഓട്ടമേഷൻ

അനുദിനം പുതുസാധ്യതകൾ തുറന്നുതരുന്ന പഠനമേഖലകളാണു റോബട്ടിക്സും ഓട്ടമേഷനും

- ബി.എസ്.വാരിയർ

മനുഷ്യൻ ചെയ്യുന്ന പല ജോലികളും മനുഷ്യനെക്കാൾ മികവോടെയും കൃത്യതയോടെയും ചെയ്യാൻ കഴിയുന്ന റോബട്ടുകൾ ഇതിനകം വ്യാപകമായിക്കഴിഞ്ഞിരിക്കുന്നു. അതീവ ക്ലേശകരമായ സാഹചര്യങ്ങളിൽപ്പോലും വിയർപ്പും തളർച്ചയും മുഷിവുമില്ലാതെ തുടർച്ചയായി പണിയെടുത്തു കൊണ്ടേയിരിക്കാൻ റോബട്ടുകൾക്കു സാധിക്കുന്നു. മെക്കാനിക്കൽ / ഇലക്ട്രിക്കൽ മാനുഫാക്ചറിങ് കംപ്യൂട്ടർ / സോഫ്റ്റ് വയർ എൻജിനീയറിങ്, ആർട്ടിഫിഷ്യൽ ഇന്റലിജൻസ്, കംപ്യൂട്ടർ എയ്ഡഡ് മാനുഫാക്ചറിങ് തുടങ്ങിയ സാങ്കേതിക സംവിധാനങ്ങൾ ഏകോപിപ്പിച്ചാണ് ഇതു സാധ്യമാക്കുന്നത്. റോബട്ടുകളുടെ രൂപ കൽപന, നിർമാണം, പ്രോഗ്രാമിങ്, ഉപയോഗം, പരിഷ്കാരം എന്നിവയെക്കുറിച്ചു പഠിക്കുകയും പ്രയോഗത്തിൽ വരുത്തുകയും ചെയ്യുന്ന ശാസ്ത്രശാഖയാണ് റോബട്ടിക്സ്.