மூர்க்கமாய் தாக்கும் கரடி மனித மூளையைத் தின்னுமா?

அந்தி நேரம். பாங்காடு. கொஞ்சமாய் இடையேராகி வயல். நடுவே ஒற்றயடிப்பாதை. அது மண்சுவரால் ஆன ஒரு கூரை வீட்டின் முன்னே முற்றுப்பெற்றது.

- கா.சு.வேலாயுதன்

சூம்பிப் போன ஒரு காலையும், வளைந்த இன்னொரு காலையும் மாறி மாறி தூக்கி வைத்து விந்தி விந்தி நடந்து வருகிறார் ஈரய்யா. அவ்வப் போது கைத்தடி ஊன்றிக் கொள்கிறார்.

இத்தனைக்கும் அவருக்கு 45 வயதுதான். நெற்றி முகமெல்லாம் குழி, குழியாய் தழும்புகள். 'மறுபடி மாடு மேய்க்கப் போகலையா' என்று கேட்டால் 'இல்லைங்க அய்யா, போறதில்லை' என்கிறார். 'மறுபடி கரடி வந்து கடிச்சிடுமோ'ன்னு பயமோ என்று கேட்டால் தலையைச் சொறிந்து கொண்டு சிரிக்கிறார்.

ஐந்தாறு மாதங்கள் முன்பு இவரையே சந்தித்திருக்கிறோம். அப்போது தலை மொட்டையடித்து, இரண்டு கால்களிலும், கைகளிலும் கட்டுப் போட்டு. கரடி ஒன்று கடித்ததில் ரொம்ப பயங்கரமாக இருந்தார்.

அந்தியூர் பர்கூர் மலைகளில் பத்து கிலோமீட்டர் தொலைவுக்கு வாகன வசதியற்று காட்டுக குள் ஒளிந்து கிடக்கும் பழங்குடி கிராமம் இது.