உலகக் கோப்பை கிரிக்கெட்டில் வைஸ் கேப்டன்... சாலையோரத்தில் விடு.. +2வில் சாதனை...!

அரசு உதவிபெறும் பள்ளி ஒன்றில் படிக்கும் மாணவி மோனிஷா சமீபத்தில் வெளியான +2 தேர்வில் 600க்கு 499 மதிப்பெண்களை எடுத்து அசத்தியிருக்கிறார்

- மகேஸ்வரி நாகராஜன்

600க்கு 600 எடுத்திருக்கும் மாணவிகள் மத்தியில் இதிலென்ன ஆச்சரியம் என்கிறீர்களா?

ஆம். ஆச்சரியமேதான்! வீடற்றவராக +2 மாணவி மோனிஷா வசிப்பது, சென்னை வால்டாக்ஸ் பகுதியில் உள்ள சாலையோரம். “எனக்கு வசிக்க வீடில்லை. சிறுவயதில் இருந்தே சாலையோரத்தில்தான் என் வாழ்க்கை...” என்கிற மோனிஷா, சத்தமில்லாமல் கூடுதலாக இன்னொரு சாதனையையும் ஏற்கனவே நிகழ்த்தியிருக்கிறார்.

ஆம். ஒருகாலத்தில் கிரிக்கெட்டில் ஆதிக்கம் செலுத்திய இங்கிலாந்தின் கோட்டைக்குள், அவர்களின் பெருமைமிகு லாட்ஸ் மைதானத்தில் 2019ல் வைஸ் கேப்டனாக  நுழைந்து, இங்கிலாந்து வீரர்களை எதிர்த்து விளையாடி, ‘தெருவோரக் குழந்தைகளுக்கான உலகக் கோப்பையை’ வென்று வந்திருக்கிறார். இந்த நிகழ்வுக்குப்பின் ஊடகங்களின் பார்வையில் அப்போதே மோனிஷா விழுந்திருக்கிறார்.

வால்டாக்ஸ் சாலையில் மோனிஷாவின் சாலையோர வசிப்பிடம் தேடி சென்றால் புன்னகையுடன் நம்மை வரவேற்றார்.

இதுதான் என் வீடென மோனிஷா கை நீட்டியது சின்னதாக அட்டைப்பெட்டி மாதிரி தகரத்தால் அடைக்கப்பட்டிருக்கும் ஒரு சிறிய அறை.

‘‘இதை எங்கள் வீடுன்னு சொல்ல முடியாது. இங்கிருக்கிற முப்பது குடும்பத்திற்கும் இது பொதுவான வீடு. இதில்தான் பெண்களான நாங்கள் உடை மாற்றுகிறோம். மற்றபடி குளிப்பது, காலைக் கடன்களை முடிப்பதெல்லாம் சாலையோரம் உள்ள கட்டணக் கழிப்பறையில்தான்.

மழை, வெயிலென எதுவானாலும எங்களுக்கு வாழ்க்கை தெருவோரம்தான்...” என்கிற மோனிஷா சிறு வயதிலேயே தன் அப்பாவை இழந்திருக்கிறார். அம்மா சென்னை மாநகராட்சியில் நகரசுத்தி தொழிலாளியாக வேலை செய்து வருகிறாராம்.

‘‘வால்டாக்ஸ் சாலையில் நிறைய கார்கோ மூவர்ஸ் இருக்கிறார்கள். அவர்களுடைய டிராலி, ரிக்‌ஷா போன்றவற்றை இரவில் சாலையோரங்களில்தான் நிறுத்தி வைப்பார்கள். பெரும்பாலும் நாங்கள் இரவில் அதில் ஏறித்தான் படுத்துத் தூங்குவோம். வயது பெண்களான எங்களுக்கு இதனால் பாதுகாப்பு இல்லாத சூழல்தான். இருந்தாலும் எங்களுக்கு வேறு வழியில்லை.

இந்திய கிரிக்கெட் அணி தோற்ற அதே ஆண்டு அதே மைதானத்தில் இவர்கள் வென்றார்கள்!