மாமன்னன் சீக்ரெட்ஸ்

சேலத்தில் நடக்கும் கதை... வேறு ஓர் அடையாளத்துடன் இருக்கும்...

- எஸ்.ராஜா

சினிமா எனும் ஊடகத்தை பொழுதுபோக்குக்காக மட்டுமல்லாமல் சமூக மாற்றத்துக்கானதாகவும் பார்க்கும் வெகு சில இயக்குநர்களில் மிக முக்கியமானவர் இயக்குநர் மாரி செல்வராஜ்.

சிறிய விதை எப்படி ஆலமரமாக பரந்து, விரிந்து பிரமிப்பை உண்டாக்குகிறதோ அதுபோல்தான் இவருடைய ‘பரியேறும் பெருமாள்’, ‘கர்ணன்’ போன்ற படைப்புகள் சமூகத்தில் பெரும் அதிர்வுகளை உண்டாக்கின.

அந்த வரிசையில் உதயநிதி ஸ்டாலின் உடன் இணைந்திருக்கும் ‘மாமன்னன்’ மிகுந்த எதிர்பார்ப்புகளை உண்டாக்கியுள்ளது என்பதை டிரைலருக்கான வரவேற்பு சொல்லாமல் சொல்லியுள்ளது.

‘மாமன்னன்’ என படத்துக்கு பெயர் வைக்க என்ன காரணம்?

கதைக்கு வலுவான தலைப்பு தேவைப்பட்டுச்சு. என்னுடைய முந்தைய படங்களான ‘பரியேறும் பெருமாள்’, ‘கர்ணன்’ போன்ற படங்களுக்கான தலைப்பு கதைக்கான பொருத்தத்தோடு இருந்திருக்கும்.‘மாமன்னன்’ பொறுத்தவரை அதிகாரத்தைக் குறிக்கும் ஒரு பெயராக இருக்கணும் என்ற அடிப்படையில் வைக்கப்பட்ட தலைப்பு. வழக்கம்போல் இந்தப் படமும் சமூக நீதி பேசும் படமாக இருக்கும். நிச்சயமாக எளிய மனிதர்களின் வாழ்வியல் போராட்டங்கள், மனவேதனை, அவர்களுக்கும் அதிகாரத்துக்குமான இடைவெளி என எல்லாவற்றையும் படம் பேசும்.

உதயநிதி...?

உதய் சாருக்கு என்னுடைய படங்கள் பிடிக்கும். ‘பரியேறும் பெருமாள்’ வெளியான சமயத்திலேயே சேர்ந்து படம் பண்ணலாமானு அவரிடமிருந்து அழைப்பு வந்துச்சு. பொது வாழ்க்கையில்  தன்னை முழுமையாக ஐக்கியப்படுத்திக் கொண்டதால் தன்னுடைய சினிமா கரியரில் கடைசிப் படமாக என்னுடைய இயக்கத்தில் படம் பண்ணணும் என்ற அவர் என்னை தேர்வு செய்தது மகிழ்ச்சியைக் கொடுத்துச்சு.

நான் சொன்ன கதை அவருக்கு பிடிச்சது. எனக்கிருக்கும் அரசியல் புரிதலைப் பற்றி அவருக்குத் தெரியும். அதனால், அவரும் கதையை உள்வாங்கும் விதத்திலும், கதையைப் புரிந்து கொள்வதிலும் எந்தவித சிக்கலும் இல்லாமல் இருந்துச்சு.