തെസ്നി ഖാൻ ഇനി സംവിധായിക

 മലയാളത്തിലെ ആദ്യ സംവിധായിക വിജയനിർമ്മല, ഷീല, രേവതി, ഗീതു മോഹൻദാസ് എന്നിവർക്കു പിന്നാലെ അഭിനയരംഗത്തുനിന്ന് വീണ്ടും പുതിയൊരു വനിതാ സംവിധായിക അരങ്ങേറ്റം കുറിക്കുകയാണ്. തെസ്നി ഖാൻ

- എ എസ് ദിനേശ്

വ്യത്യസ്തങ്ങളായ നിരവധി കഥാപാത്രങ്ങളെ അവതരിപ്പിച്ച് പ്രേക്ഷകരുടെ അംഗീകാരം നേടിയ തെസ്നി ഖാൻ, താൻ ആർജ്ജിച്ച അനുഭവ സമ്പത്തിന്റെ പിൻബലത്തിൽ ആത്മവിശ്വാസത്തോടെ ആദ്യമായി കഥയെഴുതി സംവിധാനം ചെയ്ത "ഇസ്തിരി' എന്ന ഹ്രസ്വ ചിത്രം സൈന മൂവീസിലൂടെ റിലീസായി.

അതോടെ ഒപ്പമുള്ള വനിതാ കലാകാരികൾക്കു പ്രചോദനമാവുകയാണ് നടി തെസ്നി ഖാൻ. കലാഭവന്റെ വേദികളിലൂടെ ആരംഭിച്ച് മിനിസ് ക്രീനിലും ബിഗ്സീനിലും തിളക്കമാർന്ന കഥാപാത്രങ്ങളെ അവതരിപ്പിച്ച തെസ്നിഖാന്റെ ആദ്യ സംരംഭമായ "ഇസ്തിരി ഷോർട്ട് ഫിലിം സൗഹൃദക്കൂട്ടായ്മയുടെ സമ്മാനമാണ്.

പത്ത് മിനിറ്റ് ദൈർഘ്യമുള്ള ഈ ചിത്രത്തിൽ വസ്ത്രങ്ങൾ ഇസ്തിരിയിട്ടു നൽകുന്ന മുത്തുമണി എന്ന പെൺകുട്ടിയുടെ കഥയാണ് പറയുന്നത്. തന്റെ അനുജത്തിക്കും ഇളയ സഹോദരനും വേണ്ടി ജീവിക്കുന്ന പെൺകുട്ടിയുടെ അതിജീവനം ക്ലൈമാക്സിൽ ട്വിസ്റ്റോടെ ചിത്രത്തിൽ ദൃശ്യവൽക്കരിക്കുന്നു.