ആ പറഞ്ഞതിൽ ഒരു കാര്യമില്ലേ...

പരീക്ഷണചിത്രങ്ങളാണ് ഇവിടെ പരിഗണനാ വിഷയം.

- അനീഷ് മോഹനചന്ദ്രൻ

മമ്മൂട്ടി ഫാൻസ് അദ്ദേഹത്തിന്റെ പരീക്ഷണചിത്രങ്ങൾ ഇരുകയ്യും നീട്ടി സ്വീകരിക്കുന്നു. എന്നാൽ മോഹൻലാൽ ഫാൻസ് അതിന് തയ്യാറാകുന്നില്ല. മലൈക്കോട്ട് വാലിബനെ തിരെ ചിലർ ആസൂത്രിതമായ നീക്കം നടത്തി. അവർക്കെതിരെയുള്ള നിയമപോരാട്ടം തുടരുംമുൻമന്ത്രിയും ആർ.എസ്.പി നേതാവുമായ ഷിബു ബേബി ജോൺ അടുത്തിടെ നിർമ്മിച്ച തന്റെ ചിത്രത്തിന്(മലൈക്കോട്ടെ വാലിബൻ) ബോക്സ് ഓഫീസിലുണ്ടായ തിരിച്ചടിയെക്കുറിച്ച് പ്രതികരിച്ചത് ഇങ്ങനെ ആയിരുന്നു. അദ്ദേഹം പറഞ്ഞ പരീക്ഷണചിത്രങ്ങളാണ് ഇവിടെ പരിഗണനാ വിഷയം.

അടുത്തിടെ ഇറങ്ങിയ മമ്മൂട്ടി യുടെ പല പരീക്ഷണചിത്രങ്ങളും വിജയിച്ചു എന്നത് നൂറു ശതമാനം വാസ്തവമായ കാര്യമാണ്. മലൈക്കോട്ടെ വാലിബന്റെ സംവിധായകൻ ലിജോ ജെ. പല്ലിശ്ശേരി തന്നെ സംവിധാനം ചെയ്ത മമ്മൂട്ടി ചിത്രമാണ് നൻപകൽ നേരത്ത് മയക്കം. പൊതുജനപിന്തുണയുടെ കാര്യത്തിലും കച്ചവടത്തിന്റെ കാര്യത്തിലും മികച്ച പ്രകടനമാണ് പ്രസ്തുത ചിത്രം കാഴ്ച വച്ചത്. എന്നാൽ അതിന് തൊട്ടുപിന്നാലെ അതേ സംവിധായകൻ മോഹൻലാലിനെ വച്ച് ഒരു പരീക്ഷണചിത്രം ചെയ്തപ്പോൾ പാളിപ്പോയി. ഇതിന്റെ കാരണങ്ങൾ പരിശോധിക്കാം.

മലയാളം, തമിഴ് ഭാഷകൾ മാറിമാറി കൈകാര്യം ചെയ്യുന്ന ഒരു ദ്വിഭാഷാ ചിത്രമാണ് നൻപകൽ നേരത്ത് മയക്കം. ട്രഡീഷണൽ വേ ഓഫ് നരേഷനിൽ നിന്നും മാറി പ്രമേയം കൊണ്ടും അവതരണം കൊണ്ടും അഭിനയ മികവ് കൊണ്ടും വേറിട്ടുനിന്ന ചിത്രമായിരുന്നു അത്. സാധാരണഗതിയിൽ അത്തരമൊരു ചിത്രം കൊമേഴ്സ്യലി സക്സസ് ആയില്ലെങ്കിൽ അതിൽ അത്ഭുതപ്പെടാനില്ല. എന്നാൽ അതിന് വിരുദ്ധമായി, ഇന്റർനാഷണൽ ഫിലിം ഫെസ്റ്റിവൽ ഓഫ് കേരളയിൽ നൻപകൽ നേരത്ത് മയക്കം വൻമുന്നേറ്റമാണ് നടത്തിയത്. തുടർന്ന് ഒ.ടി.ടിയിലും കാര്യമായ ചലനം സൃഷ്ടിക്കാൻ ചിത്രത്തിന് സാധിച്ചു. അടുത്തിടെയായി മമ്മൂട്ടി കൈകാര്യം ചെയ്യുന്ന പ്രമേയങ്ങൾ പലതും വ്യത്യസ്ത ഇമേജുകളുടെ തടവറകൾ ഭേദിക്കുന്നതുമാണ്.