അമൽ ഡേവിസ് ഒരു രസികൻ തന്നെ

എടാ നിനക്ക് കരിയറിനെക്കുറിച്ച് എന്തെങ്കിലും പ്ലാനുണ്ടോ?... നാളെ എന്ത് ചെയ്യണമെന്നതിനെക്കുറിച്ച് വല്ല പിടിയുമുണ്ടോ?... പബ്ബിലിരുന്ന് സച്ചിനെ ഡെഡാക്കിയ കാർത്തികയെ ഓർമ്മയില്ലേ! പ്രേമലുവിലെ നമ്മുടെ കാർത്തിക... മീനുവിന്റെ കൂട്ടുകാരി. മമിത ബൈജുവും നസ്ലിനും നായികാനായകന്മാരായ പ്രേമലു വൻവിജയമായപ്പോൾ പുതിയൊരു നായികയെക്കൂടി മലയാള സിനിമയ്ക്ക് ലഭിച്ചിരിക്കുകയാണ്. മുറുക്കാനും വായിലിട്ട് തനി ശങ്കരാടി സ്റ്റൈലിൽ അമൽ ഡേവിസ് ഒരു രസികൻ തന്നെ എന്ന ഒറ്റ ഡയലോഗിൽ തന്നെ തീയേറ്ററിൽ ചിരി നിറയ്ക്കാൻ അഖിലയ്ക്ക് സാധിച്ചു. പയ്യന്നൂർ സ്വദേശിയായ അഖില ഭാർഗ്ഗവന്റെ വിശേഷങ്ങളിലേയ്ക്ക്...

- പി.ജി.എസ്. സൂരജ്

സ്നേഹം നിറഞ്ഞ പ്രേമലു

പ്രേമലു എന്റെ മൂന്നാമത്തെ സിനിമയാണ്. സിനിമ വലിയ വിജയമാകുമെന്ന് പ്രതീക്ഷിച്ചിരുന്നു. എന്നാലും സൗത്ത് ഇന്ത്യ മുഴുവൻ ഹിറ്റടിക്കും എന്ന് പ്രതീക്ഷിച്ചിരുന്നില്ല. നല്ല ടീമായിരുന്നു. ഒരുപക്ഷേ ക്യാമറയ്ക്ക് പുറത്തും നല്ല ബോണ്ടിംഗ് ഉണ്ടാക്കിയെടുക്കാൻ ഞങ്ങൾക്ക് കഴിഞ്ഞതു കൊണ്ടാകാം നന്നായി അഭിനയിക്കാനായത്. പിന്നെ നസ്സിനെയും സംഗീതേട്ടനെയും(അമൽ ഡേവിസ്) നേരത്തെ പരിചയമുണ്ടായിരുന്നു. പൂവൻ സിനിമയുടെ ഷൂട്ടിന് ഒരു ദിവസം നസ്സിനും ഉണ്ടായിരുന്നു. തണ്ണീർമത്തനിൽ സ്പോട്ട് എഡിറ്ററായിരുന്നു സംഗീതേട്ടൻ. ആ സമയം തൊട്ടുള്ള പരിചയം ഇവർ തമ്മിലുണ്ട്. പ്രേമലുവിൽ കൂടുതൽ കോമ്പിനേഷൻ മമിതയുമായി ആയിരുന്നു. പ്രായത്തിൽ എന്നെക്കാൾ ചെറുതാണെങ്കിലും അഭിനയത്തിന്റെ കാര്യത്തിൽ എക്സ്പീരിയൻസുണ്ടല്ലോ. നേരത്തെ തന്നെ ഹിറ്റ് സിനിമകളുടെ ഭാഗമായ ഇവരൊക്കെ എങ്ങനെയാകും എന്നെ സ്വീകരിക്കുക എന്ന ടെൻഷനുണ്ടായിരുന്നു. പക്ഷേ ടെൻഷനൊക്കെ വെറുതെയായിരുന്നു. ഏറെനാളായി പരിചയം ഉണ്ടായിരുന്ന ഒരു സുഹൃത്തിനെപ്പോലെയാണ് മമിത എന്നെ പരിഗണിച്ചത്. ബോൾഡായ പെൺകുട്ടിയാണവൾ.

ഷൂട്ടിംഗിന് കുറച്ചുദിവസം മുൻപ് ആക്ടിംഗ് വർക്ക് ഷോപ്പ് ഉണ്ടായിരുന്നു. ആ സമയത്ത് ഞങ്ങൾ എല്ലാവരും തമ്മിൽ നല്ലൊരു ബന്ധം രൂപപ്പെട്ടു. കുറച്ച് സീനുകൾ റിഹേഴ്സൽ ചെയ്തു നോക്കി. തിരുവനന്തപുരത്തും കൊച്ചിയിലുമാണ് പല സീനുകളും എടുത്തത്. ഹൈദരാബാദിൽ എത്തിയപ്പോഴേയ്ക്കും ഞങ്ങൾ തമ്മിൽ നല്ല അടുപ്പത്തിലായി. ഞാനും മമിതയും മീനാക്ഷിയും ഒരുമിച്ചായിരുന്നു താമസിച്ചത്. മറ്റൊരു റൂമിൽ നസ്സിനും ശ്യാം ഏട്ടനും(ആദി) സംഗീത് ഏട്ടനും ഒരുമിച്ചായിരുന്നു. ഓരോ ദിവസവും ഷൂട്ട് കഴിഞ്ഞു ഞങ്ങളെല്ലാവരും ഒരുമിച്ച് കൂടും. പിന്നെ ഫുഡ് ഉണ്ടാക്കി കഴിച്ച് വിശേഷങ്ങൾ ഒക്കെ പറഞ്ഞ് അടിച്ചുപൊളിക്കും. ഇതായിരുന്നു പതിവ്. ഒരു കുടുംബം പോലെയാണ് ഞങ്ങൾ അവിടെ കഴിഞ്ഞത്.

സിനിമ ഹിറ്റടിച്ചതിന്റെ ത്രിൽ