വക്കീൽ കുപ്പായത്തോട് നോ പറഞ്ഞു സിനിമാലോകത്തേക്ക്

മലയാളി പ്രേക്ഷകർ ഹൃദയംകൊണ്ട് സ്വീകരിച്ചി വാഴ എന്ന ഹിറ്റ് സിനിമയിലെ നായികമാരിൽ ഒരാളായ മീനാക്ഷി ഉണ്ണി രൂപവാണി മനസ്സ് തുറക്കുന്നു

- രജനി കൃഷ്ണ

അച്ഛൻ ഉണ്ണി പ്രൊഡക്ഷൻ കൺട്രോളർ ആയിരുന്നു. കുഞ്ഞുന്നാളിൽ അച്ഛനോടൊപ്പം പല സിനിമാ ലൊക്കേഷനുകളിൽ പോകാനുള്ള അവസരം ലഭിച്ചിട്ടുണ്ട്. അങ്ങനെ ഒരിക്കൽ തൊമ്മനും മക്കളും സിനിമയുടെ സെറ്റിൽ അതിന്റെ ക്ലൈമാക്സ് ചിത്രീകരണദിവസം പോകാനിടയായി. അന്ന് മമ്മൂക്ക പെർഫോം ചെയ്തത് ഇന്നും ഓർമ്മയിലുണ്ട്. അതുപോലെ ഒരു ദിവസം എനിക്കും ക്യാമറയ്ക്ക് മുൻപിൽ പെർഫോം ചെയ്യണം എന്ന് ഞാൻ മനസ്സിൽ കുറിച്ചു. സ്വപ്നത്തിലേക്ക് കൈപിടിച്ച് തരാൻ അച്ഛനുണ്ടെന്ന വിശ്വാസം മൂന്നാം ക്ലാസിൽ അസ്തമിച്ചു. ഹൃദയാഘാതത്തെ തുടർന്ന് അച്ഛൻ ഞങ്ങളെ വിട്ടുപോയി. അതോടെ സിനിമാമോഹം മനസ്സിന്റെ ഒരു മൂലയിലേക്ക് തൽക്കാലം ഒതുക്കിവെച്ചിട്ട് പഠിക്കാൻ തുനിഞ്ഞു.

കുസാറ്റിൽ നിന്ന് നിയമം പഠിച്ചു. ഹൈക്കോടതിയിൽ വക്കീലായി. എൻറോൾ ചെയ്തുകയറി. വക്കീൽ കുപ്പായം അണിഞ്ഞു കോടതിവരാന്തയിലൂടെ നടക്കുമ്പോഴാണ് എനിക്ക് മനസ്സിലായത്, എന്നോടൊപ്പം, ആ മുലയിലെ കൊച്ച് ആഗ്രഹവും വലുതായിരുന്നന്ന്. പതുക്കെ മാടമ്പള്ളിയിലെ തെക്കിനിയിലെ വാതിൽ തുറക്കുന്നത് പോലെ, ഞാനും ആ ആഗ്രഹത്തെ തുറന്നുവിടാൻ തന്നെ തുനിഞ്ഞു. യെസ് യുവർ ഓണർ എന്നതല്ല, ആക്ഷനും കട്ടും ആണ് എന്റെ ആവശ്യം എന്ന് മനസ്സിലാക്കിയ ഞാൻ വക്കീൽ കുപ്പായത്തോട് ബൈ പറഞ്ഞു.

ആദ്യ സിനിമ വാങ്കിലേക്കുള്ള യാത്ര