മലയാളത്തിന്റെ കീർത്തി

തെലുങ്ക് ചിത്രം ‘മഹാനടി’യിലൂടെ ദേശീയപുരസ്കാരത്തിന്റെ നെറുകയിലെത്തിയ കീർത്തി സുരേഷ്. മലയാളത്തിലേക്കുളള മടങ്ങിവരവിനെക്കുറിച്ച് സംസാരിക്കുന്നു

- രേഖ നമ്പ്യാർ

ഇരുപത് വർഷങ്ങൾക്കുമുമ്പ് അച്ഛൻ സുരേഷ് കുമാർ നിർമിച്ച കുബേരൻ എന്ന സിനിമയിൽ ബാലതാരമായി അഭിനയിച്ചാണ് കീർത്തി സുരേഷ് മലയാളത്തിൽ അരങ്ങേറ്റം കുറിച്ചത്. പിന്നീട് മോഹൻലാൽ-പ്രിയദർശൻ ചിത്രം ഗീതാഞ്ജലിയിലൂടെ സിനിമയിലേക്കിറങ്ങിയ കീർത്തി, ദിലീപ് ചിത്രം റിങ് മാസ്റ്ററിൽ നായികയായി.

അതിനുശേഷം ഏഴെട്ട് വർഷത്തേക്ക് കീർത്തിയെ മലയാളത്തിൽ കണ്ടതേയില്ല. ഇടയ്ക്ക് ‘മരയ്ക്കാർ സിനിമയിൽ അതിഥിവേഷത്തിൽ വന്നെങ്കിലും തമിഴ്, തെലുങ്ക് ഭാഷകളിൽ കൈനിറയെ സിനിമകളുമായി തിരക്കുകളുടെ ലോകത്തേക്കുള്ള തേരോട്ടമായിരുന്നു. ചുരുങ്ങിയ നാളുകൾക്കുള്ളിൽ മഹാനടി' എന്ന തെലുങ്ക് സിനിമയിലൂടെ മികച്ച നടിക്കുള്ള ദേശീയ പുരസ്ക്കാരവും കീർത്തി സ്വന്തമാക്കി.

ഒരു നിമിത്തം പോലെ, ഇപ്പോഴിതാ അച്ഛൻ നിർമിച്ച വാശി' എന്ന സിനിമയിലൂടെ വീണ്ടും മലയാളത്തിൽ ഒരു മുഴുനീള വേഷത്തിൽ എത്തിയിരിക്കുകയാണ് കീർത്തി, വാശി കീർത്തിയെ സംബന്ധിച്ചിടത്തോളം കുടുംബാംഗങ്ങളുടെ ഒത്തുചേരൽ കൂടിയായിരുന്നു. അച്ഛൻ നിർമാതാവായും അഭിനേതാവായും എത്തിയപ്പോൾ സഹനിർമാതാക്കളായാണ് അമ്മ മേനകയും സഹാദരി രേവതിയും കൂടെക്കൂടിയത്. ഒ.ടി.ടിയിലും തിയേറ്ററിലുമായി തുടരെ വന്ന ചിത്രങ്ങളെല്ലാം സൂപ്പർ ഹിറ്റായതിന്റെ സന്തോഷത്തിലാണ് കീർത്തി സുരേഷ്. ചെറുപ്പം തൊട്ട് സിനിമ മാത്രം കൊതിച്ച്, എതിർപ്പുകളെ തുരത്തിയോടിച്ച് സിനിമയിലെത്തിയ കീർത്തി സുരേഷ് ഇപ്പോൾ തെന്നിന്ത്യൻ സിനിമാലോകം തന്നെ കീഴടക്കിയിരിക്കുകയാണ്.