എന്റെ സഹോദരൻ

“മണിയെ ആദ്യം കാണുമ്പോഴെല്ലാം അത്ലറ്റ് കാൾ ലൂയിസിന്റെ രൂപമാണ് മനസ്സിലേക്കെത്തിയിരുന്നത്. അയാളുടെ ശരീരഭാഷയ്ക്ക് വേഗവും ദൂരവും താണ്ടുന്ന ആ കായികതാരത്തിനോട് ഒരുപാട് സാമ്യമുണ്ടായിരുന്നു, മമ്മൂട്ടിയുടെ ഓർമകൾ...

- മമ്മൂട്ടി

മറുമലർച്ചി എന്ന തമിഴ് സിനിമയിൽ അഭിനയിച്ചു കൊണ്ടിരുന്ന സമയം. വടിവേലുവിന് അതിലൊരു വേഷമുണ്ടായിരുന്നു. പക്ഷേ, അദ്ദേഹത്തിന് അസൗകര്യം. പകരക്കാരനു വേണ്ടിയുള്ള അന്വേഷണത്തിലായിരുന്നു അണിയറപ്രവർത്തകർ. അന്വേഷണം എന്റെ മുന്നിലെത്തിയപ്പോൾ ഞാൻ മണിയുടെ പേരുപറഞ്ഞു, ഒപ്പം ഒരു നിബന്ധനയും വച്ചു, “വിളിച്ചു വരുത്തിയശേഷം വേഷം നൽകാതെ വിടരുത്; അയാൾ മലയാളത്തിലെ തിരക്കുള്ള നടനാണ്.

അവർ വിളിച്ചപ്പോൾ തമിഴറിയില്ലെന്നു പറഞ്ഞ് മണി ആദ്യമൊന്നു വലിയാൻ നോക്കി. ഞാൻ വിളിച്ചപ്പോൾ മണി പറന്നെത്തി. സംസാരിച്ചു ഫോൺ വച്ചതിന്റെ അടുത്തനാൾ തന്നെ മണി തിരുവണ്ണാമലയിലെ ലൊക്കേഷനിലെത്തി.

"മറുമലർച്ചി'യിൽ തെങ്ങുകയറുന്ന ഒരു രംഗമുണ്ട്. 'സല്ലാപത്തിലൊക്കെ തെങ്ങുകയറ്റം കണ്ടതിനാൽ എനിക്ക് പ്രത്യേകിച്ച് അദ്ഭുതമൊന്നും തോന്നിയില്ല. പക്ഷേ, സെറ്റിലുള്ളവർ കണ്ണുമിഴിച്ചുനിന്നാണ് ആ കാഴ്ച കണ്ടത്.

 സെറ്റിൽ വച്ചുണ്ടായ ഒരപകടം ഇന്നും ഓർമയിലുണ്ട്, തെങ്ങിൽ നിന്നുവീണ് മണിയുടെ കാലുളുക്കി. പക്ഷേ, അതു വകവയ്ക്കാതെ അഭിനയം തുടർന്നു. അതായിരുന്നു മണി; പെട്ടെന്നൊന്നും തോൽക്കാൻ അയാൾ തയ്യാറായിരുന്നില്ല.