ജീവിതവും പാട്ടും

നാടൻപാട്ടിന് ഒട്ടുമിക്ക ജില്ലകളിലും വേരുകളുണ്ടായിരുന്നെങ്കിലും കലാഭവൻ മണിയുടെ വരവോടെയാണ് അതിനൊരു ജനകീയമുഖം കൈവന്നത്

- ഗോപാലൻ മങ്കട

കേരളത്തിൽ നിലനിന്നിരുന്ന സാമൂഹ്യവ്യവസ്ഥ, സംസ്കാരങ്ങൾ, ആചാരങ്ങൾ, അനുഷ്ഠാനങ്ങൾ, കൃഷി, ജാതിവ്യവസ്ഥ, മരണാനന്തരചടങ്ങുകൾ തുടങ്ങി എല്ലാ മേഖലകളേയും സ്പർശിച്ചു കൊണ്ട് അജ്ഞാതരായ മണ്ണിന്റെ മണമുള്ള ‘മഹാകവികൾ' സൃഷ്ടിച്ചവയാണ് ആദ്യകാല നാടൻപാട്ടുകൾ. ഇന്ന് കച്ചവടക്കണ്ണോടുകൂടി പലരും നാടൻപാട്ടുകൾ രചിക്കുകയും നാടൻപാട്ടിന്റെ ആത്മാവിന് ചോർച്ച സംഭവിക്കുകയും ചെയ്തിട്ടുണ്ട്.

ഭാഷയുടെ വ്യാകരണശാസ്ത്രം നാടൻ പാട്ടിന് ഉണ്ടായിരിക്കണമെന്നില്ല. കേരളത്തിലെ വ്യത്യസ്തമായ പ്രദേശങ്ങളിൽ നിലനിന്നിരുന്ന ഭാഷകളിലായിരുന്നു നാടൻ പാട്ടുകൾ രൂപപ്പെട്ടിട്ടുള്ളത്. പല നാടൻപാട്ടിലും ചെന്തമിഴിന്റേയും കന്നടഭാഷയുടേയും സ്വാധീനം കാണാൻ കഴിയും. ആദ്യകാലത്ത് വാമൊഴിയിലൂടെ തലമുറകളായി കൈമാറി വളരെയധികം മാറ്റങ്ങൾക്കു വിധേയമായിട്ടുള്ളവയാണ് ഇന്ന് നിലനിൽക്കുന്ന പല നാടൻപാട്ടുകളും. നമുക്കറിയാവുന്ന മിക്ക നാടൻപാട്ടുകളും ആദിവാസി, ദളിത് വിഭാഗങ്ങളിലെ കലാകാരന്മാർ അവരുടെ ജോലിഭാരം കുറയ്ക്കാൻ വേണ്ടി സന്ദർഭോ ചിതമായി ഉണ്ടാക്കി, പാടി തലമുറകൾക്ക് കൈമാറിയവയാണ്. കൃഷിയുമായി ബന്ധപ്പെട്ട പാട്ടുകൾ അതിനുദാഹരണമാണ്.

തൈതിനന്തോം താരതിത്തക
തൈതിനന്തോം താരാ --(2)
അരികുറുക, ചെറുകുറുക
ജീരകചെമ്പാവ്,
വിത്തെല്ലാം വാരിപാകുന്നേ,
വിത്തെല്ലാം വാരിപാകുന്നേ
"തള്ള ഞാറുനിക്ക് നിക്ക നിക്ക
“പിള്ള ഞാറു പറിക്കുന്നേ
പിള്ളേരുള്ള തള്ളമാരെല്ലാം
അരിവരമ്പത്തു നിക്കുന്നേ
മുത്തിക്കുനി മുതുക്കികളെല്ലാം
നടവരമ്പത്തു നിൽക്കുന്നേ
പറിക്കുന്നേ ഞാറു പറിക്കുന്ന
പിടിഞാറുകെട്ടി എറിയുന്നേ
തെയ്തിനന്തോം താരതിത്തക തെയ്തിനന്തോം താര ..(2) ചെമ്പകനെല്ലിന്റെ ചുണ്ടുചുവന്നപ്പോൾ
തമ്പ്രാനുണ്ട് വരമ്പത്ത്
ഉണ്ണിക്കുടവയർ ഓമനത്തമ്പുരാൻ
ചൂളം കുത്തി നടക്കുന്നേ...